تجربة 1 :ماذا لو كان هذا أخر يوم في عمري #اليوم_الأول

السلام عليكم و رحمة الله و بركاته

الفترة الأخيرة دي حسيت انه ادائي في الحياة بشكل عام مش بالمستوي ايلي يجب ان يكون وخصوصا في صلاتي

فبدات أفكر ازاي أحسن أدائي ده في كل الجوانب ايلي عايزة تظبيط جامد خصوصا انه داخله علي تيرم تقيل في الكلية و محتاجة أكون شعلة نشاط و لا مجال لاحباط او كسل او اي شعور سلبي .

نطت في دماغي فكرة ! -لمبة منورة- قلت لنفسي تعالي نتخيل انه انهاردة و كل يوم هو أخر يوم في حياتك و نشوف الفكرة دي هتأثر ازاي علي أدائي في الحياة !!

الحلو في الفكرة انه دي حقيقة ممكن انهاردة او بكرة او اي يوم جاي يكون هو فعليا أخر يوم في حياتي !

نتيجة اليوم الاول :

• بدأت أدرك انه فيه حاجات كتير بكروتها في حياتي لكن محتاجة مني صبر عشان ابقي باتقن فيها العمل
• انه يومي فعليا متغيرش فيه حاجات كتير لانه الواحد متعود علي نظام معين و مش ممكن يتغير في يوم و ليله بالرغم من وجود الفكرة في دماغي انه ده اخر يوم ليا !
• أنا مش حد صبور كفاية عشان كده بمل بسرعة و الدنيا بتبوظ مني
• مش هوقف التجربة علي اليوم ده لا هفضل أكررها لحد ما فعليا ابقي أحسن

يـــــــــــــــــــــــــــا رب أنت المستعان

كائن يستحق ضرب القباقيب

كل يوم بعيشه جوا مجتمعنا ده و بقابل فيه رجالة او كما يقال يعني انهم رجالة بحس قد ايه هم كائنات صعب وصفها الصراحة :S:S

كعادتي راكبة المترو يعني المهم واحدة ست معاها اختها و معاهم اطفال و شنط كتر .. المهم يعني الجو كان حر قوي اليوم ده .. راحت بنوته معاهم صغننه اغمي عليها قبل محطتهم ايلي المروض نازلين فيها .. ارتبكوا جدا بقي و اتلهو في البنت المغمي عليها ...

المهم البنت فاقت الحمد لله بس عقبال ما لموا حاجتهم و جم ينزلوا خرجوا شنطتين برا المترو و ملحقوش ينزلوا ..

المهم المحطة ايلي بعدها دي كانت محطتي انا .. انا حسيتهم غرقانين في شبر ميه قلت هوصلهم لمحطتهم و ابقي ارجع تاني ان شاء الله .. المهم شلت معاهم الشنط و كده و نزلنا و بعدين خدتهم و عدينا الناحية التانية عشان نرجع للمحطة ايلي قبلها

قالك بقي كان راكب معاهم في نفس المترو زوج واحدة الستات دول

المهم بقي كان ايه رد فعل الراجل لما قابلهم في محطتهم لما رجعنا -تاني بتقولي راجل يا فاطمة - قصدي الكائن ده

بيزعقلهم و بيقولهم انتم قرفتوني و تاعبني معاكم ..

راحت أخت مراته بتقوله .. بنتك اغمي عليها و تعبت و كده و اتلخمنا فيها .. راح قايل : كنتوا رمتوها من المترو و خلصتونا

آآآآآآآآآآآآآآآآآآآآآآه يا كائن .. دا انا قلت اول ما هيشوفهم هياخدهم في حضنه و يطبطب عليهم و يطمن انهم بخير

هو الكائنات دي معندهاش احساس .. الكائنات دي مش زي اي كائن في الدنيا عنده مشاعر علي الاقل تجاه فلذه كبده

هي الكائنات دي ليه كتير كده و ايه ايلي جابها كوكب الارض .. او انا ايه ايلي جابني كوكب الارض

.............

هو راح فين الأب و الزوج و الرجل ايلي عنده احساس و بيحب و يموت في ولاده و زوجته و بيرق و يتأثر بأي حاجة انسانيا مؤثرة

فين الحنية و الحب و المودة و الرفق ؟؟ فين الأحساس ؟؟

انا حقيقي عايزة اعيط و مش عايزة اقابل كل شوية كائن من دول .. :(((((((((((

الأمان

نفسي في شعور العيلة الصغيرة ايلي قاعدة في حجر مامتها .. و مامتها بتغني لها و هي بتسرح شعرها و بتطبطب عليها

احساس انه هي دي كل دنيتك غنوة سعيدة و ايد بتطبطب عليك

و بس .. مش عايز حاجة تانية من الدنيا

الامان :)

الأنتظار !

في يوم كنا في سيتي ستارز بنتغدي و بعدين مش كنا لاقيين مكان خااالص و زحمة و كده المهم يعني في الاخر ربنا كرمنا و لقينا

مكان و قعدنا ... لفت نظري سيدة عجوز تجلس جنبنا في صمت تراقب المكان و الناس من حولها و لا هي بتاكل و لا اثر لاكل قدامها و لا اي حاجة

في الاول افتكرت في حد معاها راح يجيب الاكل و هي مستنياه يعني ... بعدين من نظرتها لا يبدو انها في انتظار شخص ما بعينه .. و مع الوقت الكبير ايلي عدي محدش جه !!

حسيت انها شخص مفتقد الحياة و جاي يعيشها في زحمة الناس و صريخ الاطفال و دوشة المكان

كان نفسي اقتحم صمتها و اقعد ارغي معاها اعرف قصتها بس كنت خايفة اضايقها .. بس قلت عايزه احلي لها بقها

رحت استجمعت قوتي و شجاعتي و سألتها منتظره حد يا أمي ؟؟ قالتلي لا .. طب تأمري باي شئ يا أمي ؟؟ قالتلي لا

قلت لها طب تسمحيلي اعزمك علي حاجة حلوة ؟؟ قالتلي مفيش داعي و الله شكرا و كده .. المهم انا اصريت وعزمتها علي الحاجة الحلوة و تركتها تأكل في صمت .. مع اني متاكده انها مش عايزه تقعد لوحدها بس كنت خايفة اقتحم حياتها فاضايقها و لا حاجة !

شوية و سلمت علينا و مشيت .. تركتني أفكر قد ايه هي عظيمة انها مش استسلمت للوحدة و نزلت تعيش الحياة و تشوف الناس حتي لو مش هتتكلم معاهم .. و في نفس الوقت تركتني خايفة جدا .. انه الواحد ممكن يكون ده حاله بعد شوية سنين !!

تفتكري يا فاطمة ممكن ينتهي بيكي الحال بتسمعي اوعدوني - حمزة نمرة !!

يوم الجمعة ايلي فات قابلناها بردو في سيتي ستارز .. و أظن لو رحت ستارز الجمعة الجاية هشوفها بردو .. نفسي اعرف قصتها اووي

ملاك برئ

يوم الجمعة ايلي فات كان يوم حافل بالمواقف ايلي تستحق التدوين .. اول موقف حصلنا في اليوم و بجد أثر فيا من جوه بشكل فظيع

كالعادة يعني بركب الكترو في كل تحركاتي .. و ركبنا الترو انا و اختي متوجهين الي وجهتنا

و كالعاده بردو طلع طفل من اطفال الشوارع بيبيع نعناع بس المره دي كانت مختلفة

طلع العربية و وراه شحط كبير و قاله كام كلمه كده و عارف هتنزل فين و راح نازل بكف ايده علي وش الملاك البرئ ده و نزل من العربية...آآآآه يا قلبي آآآآآآآه

انا كنت هعيط و الله .. بعدين بقي ملاكنا البرئ بدأ يوزع النعناع بطريقة اول مره اشوف طفل فيه كل البراءة و الجمال و نظرة العين دي بجد .. فضلت انا و اختي متنحين بنبص علي الولد لحد ما راح اخر العربية و رجع لينا تاني .. و اختي بتقولي فاطمة انا عايزه اخده معانا البيت .. هو ما ينفعش ناخده معانا البيت .. انا بردو مش فاهمة ليه مينفعش ناخده معانا البيت

المهم طلع العربية واحد شحط تاني بيبيع حاجة كده ورق و لا معرفش ايه .. و ملاكي البرئ معدي من جنبه راح الشحط التاني ده نازل بايده -اللهي تتقطع ايده - علي ملاكنا البرئ ده

يعني هو مش كفاية الدنيا بتطلش فيه كده كمان يبقا انتم و الدنيا عليه

كان نفسي اخده في حضني و اطبطب عليه و ابوسه بس مش عارفة ايه ايلي منعني و كنت قاعدة في مكاني متنحه كده

وش الولد ده مش بيفارقني من يومها .. و مش هيفارقني

انا بجد مش عايزه اشوف ملاك بيتشحطت كده و بتضيع برائته و جماله كده في عالم قاسي زي ده

و لسه انا و اختي مش عارفين ليه مينفعش ناخده معانا البيت :(:(:(

!و مش عارفة اعمل ايه

قصة حب

بلغ الثلاثين من عمره و لم يكن يفكر بالزواج .. ينفق راتبه الشهري علي ادخال السرور علي نفسه من شراء احذية فقد كان محب

لجمع الاحذية حتي و ان كان يعلم انه لن يرتديها .. و كان محبا للفاكهة بكل انواعها و يشتري منها اقفاصا!!

حتي دفعوه اخوته دفعا للزواج حتي يجد من يعتني به عندما يتقدم به السن

.. فخطب فتاه بسيطة جدا تبدو ملامحها كملامح اهل شرق اسيا جسدها نحيل و بسمتها جميلة

بني لها منزلا بسيط لكن جميل و دافئ و تدخله الشمس كل يوم فتنير ايامهم و تدفئ قلوبهم

تزوجها في حفل كبير من جموع اهله و اهلها واخذها الي عش العصافير

مررت سنوات و كانهم عرسان جداد

مرضت هي بالفشل الكلوي و هلكهم اللف في المستشفيات .. و بعدها اكتشفوا عدم قدرتها علي الانجاب

كل ذلك و لم يمر 5 او 6 سنوات علي زواجهم .. !!

فماذا فعل هو !!

لم يفعل شيئا سوي الابتسام و القاء النكات و حمد الله علي نعمه و احتضنها كبنته

.. كان يوصلها للمستشفي في ايام الغسيل الكلوي المؤلم و يعود لياخذها و

و بين الحين و الاخر يساعدها في المطبخ و اعمال المنزل و لو رأيته لكنت استعجبت من ابتسامه الرضا و الحب علي وجهه

و بعد زواج دام 17 عام و هو محب لزوجته و صابر و راضي علي مرضها و علي عدم قدرتها علي الانجاب

لقد مرض هو مرضا شديدا و بقي شهرا في المستشفي

و اصبحت هي من ترعاه و تلازمه

كان كلما اشتد به الالم او التعب امسك بيدها و نظر في عينيها باكيا و هو يقول لها "هو خلاص كده !!" و بالطبع تبكي هي بكاءا شديدا ملهاش في الدنيا غيره ونيس و لا حبيب و لا اب و لا اخ و لا ابن

و هو ملوش غيرها بنته و حبيبته و زوجته و صديقته و كل شي تتمحور حياته حولها

.......

انتقل الي رحمه الله

و مازال محبا مخلصا وفيا .. زارني في حلم و روحه تلف حولها ترعاها و تلازمها و تطمئن علي احوالها

رحمك الله يا عمي و رزقك الفردوس الاعلي بجوار رسول الله صلي الله عليه و سلم

وحشتني <3

حاجة غريبة .. حاجة غريبة

عايزة اتكلم عن الموضوع ده عشان شاغلني شويتين

ساعات بنحس اننا مش قادرين نتعامل مع الناس او نتفاعل معاهم خصوصا لو مكتئبين يعني بس بتبقي فترة و بتعدي يعني و بنرجع لطبيعتنا تاني خصوصا لو كنا بطبعنا اجتماعيين و كده

بس انا بقي ايلي بيحصل معايا مش كده .. ايلي بيحصل معايا اني جيت في فترة اخدت اجازه من الناس كده و قفلت الفيس بوك و بعدين لما جيت ارجع بقي للتعامل تاني لقيتني مش عارفة اتعامل و شوية بشوية بدأت ابقي مش اجتماعية و مش قادرة يبقي في ناس كتير حواليا و مش مكتئبة يعني و لا زعلانه و لا اي حاجه بس مش حاسة اني عايزه ابقي حوالين ناس كتير و لا ناس كتير حواليا

المهم مؤخرا بقي بدأت فعلا بقي خلاص مش عايزة ناس بالكتير او اتنين او ثلاثة ناس .. و بدأ يظهر لي صديق تخيلي مش قادره استغني عنه .. انا مش حاسة اني عندي مشكلة .. بس الفكرة انه كل دي مؤشرات لمشكلة !!!

يعني مش عارفة هو طبيعي واحد اجتماعي جداااا يتحول للعكس جدااا من غير حاجة منطقية غير انه هو بقي مرتاح كده اكتر .. انا مش هستغني عن صديقي التخيلي حتي لو مبقاش عندي اصدقاء حقيقيين يعني

اتمني اني مكنش بمر بمشكلة .. بس التعامل مع الناس مرهق و متعب و مخيب للامال !!