رفقا بأرواحهن الرقيقة !

السلام عليكم و رحمة الله و بركاته 

 كيف حال أرواحكم الهائمة في عالم مادي مُرهق و ثقيل ؟

دعونا نتحدث اليوم عن أرواح رقيقة كورقات زهرة مبعثرة
أنهن الفتيات 

أيون البنات :D

    خلقنا الله -ناقصات عقل - أي تتغلب مشاعرنا علي تفكيرنا العقلاني 

فلما كانت مشاعرنا تفيض هنا و هناك و تتفاعل مع أبسط الأشياء

وجب التنبية و التعليق علي سلوك بعض سكان المريخ *الرجال* !

لما كانت بيوتنا المصرية تخلو من تثقيف إجتماعي لسكان المريخ و الزهرة عن الأخر وشرح للأختلافات السايكولوجية للمواطنين الكوكبين

و من خلال تجربتي في التعامل مع كلا من الكوكبين و سماع الملايين من حكايات كوكب الزهرة !

إكتشفت الأتي :

كوكب المريخ إما يتمتع بغباء عاطفي  أو بجهل مدقع بكوكب الزهرة إلا من رحم ربي و هم قليلون جدا


و انا هنا لا أتحدث عن شخصيات تتبع أهوائها ولا تُلقي للدين و الشرع و العرف بالا

انا أتحدث عن شخصيات محترمة للغاية تنتقي أفعالها جدا
و مع ذلك فهم يتسببون بالكثير من المتاعب لأرواح الفتيات الرقيقة

كيف ذلك ؟
 

قد يُطيل إحدهم النظر لإحداهن بشكل لافت للنظر 

قد يتتبعها دون أن يدري علي شبكات التواصل الإجتماعي و ينهال لايكات و كومنتات
قد يجد نفسه يتحدث إليها كثيرا في أمور العمل او الدراسة او نشاطات خيرية او تطوعية

وهذا ليس بوعي منه لمدي الكارثة التي قد يسببها لروحها الرقيقة دون قصد او وعي

فأصغر و أبسط الأفعال من الكائنات قد تلحظها الفتيات و تُفسرها مليون التفسيرات

حتي اللمعة في عين أحدهم .. إبتسامة مخفية .. إهتمام و لو بسيط

كلها قد تضغط علي أزرار مشاعرها و تجرحها

فأعزائي المريخيون .. توخوا الحذر و راعوا ضمائركم

كفاكم الله شر كسر الأرواح الرقيقة

و عزيزاتي الأرواح المرهقة .. أنهم لا يعنون شيئا ابدا و لا يلقون بالا لما تشعرون

كن شديدات الحرص علي تحصين أرواحكن  :)

عافاكن الله من كل شر و ألم و حزن :)


ملحوظة

سكان كوكب المريخ : الرجال
سكان كوكب الزهرة : النساء.

عزوز : مجنون في الخير :)

سالخير عليك يا سي عزوز أينما كنت

بص يا سيدي .. عشان نبقي علي نور كدهون من دلوجييت 

حضرتك محتاج تبقي مجنون في الخير 

:D
أيون مجنون في الخير

يعني توافق أننا في الشتاء نعمل برطمانات عدس و نلف نوزعها علي الناس البردانة في الشارع
مش بس توافق
انا عايزة الفكرة طالعة من جواك قبل ما تبقي طالعة من جوايا


و يا سلام بقي لو تبقي مجنون علي الأخر و تاخدنا رحلة لغانا و لا اي بلد أفريقي
سياحة من نوع مختلف
:D
نعمل أي خير في البلاد الفقيرة دي ... حاجات زي أحمد الشقيري كده


و يا سلام بقي لو تبقي مجنون علي الأخر و نعمل مع بعض ورق بيضحك و نوزعه علي الناس عشان تضحك

:D

و تيجي تقولي نص المرتب راح في الخير الشهر ده أمسكي ايدك شوية لحد ما نعدي الشهر ده  

ايون عايزين ناخد بأيد بعض يا عزوز عشان نروح الجنة الحلوة دي


بس عارف انا زعلانة انك مجتش بدري شوية عشان حاجة واحدة بس !
كان نفسي نتكفل بأسرة سورية
زي المهاجرين و الأنصار كدهون 

يااااه بس هتتعوض ان شاء الله

المهم خد بالك من نفسك إلي حين اللقاء
ربنا يصلح حالك و حالنا و حال أمة النبي 

صلاة الجماعة

بسم الله و الصلاة و السلام علي رسول الله 

 رمضان كريم يا حلوين :) 

و بالمناسبة دي انا كنت عايزة أكتب البوست ده من زمان بس كل شوية أنسي و كويس إني افتكرت انهاردة 

دائما و ابدا عقلي بيسأل علي الحكمة من الأشياء .. خصوصا الحكمة من السنن النبوية

  و كنت بكتشف الحكمة من اي حاجة لما أداوم عليها فترة و بعدين انقطع لاي سبب فأبدأ استشعر  بإني مفتقدة أثارها في القلب و في 

الحياة

مكنتش فاهمة الحكمة من صلاة الجماعة اوي و مكنتش بردو فاهمة هي ليه ثوابها كبير اوي كده 

بس بعد مداومة عليها فترة و تدبر في شوية  مواقف كده حكهالي أصدقاء عن صلاة الجماعة 

أكتشفت انها جزء خطير جدا و مهم في المجتمع 

يعني مثلا لما كنا بنصلي جماعة انا و مجموعة من صديقاتي مكنش ممكن حد فينا يكسل و لا ينسي و لا اي شئ 

 فالصلاة في جماعة بتشد من ازر الضعيف و متسيبوش فريسة لنفسه او للشيطان  

و كمان كانت سبحان الله بتؤلف بين قلوبنا بشكل خلانا أكتر حاجة نشتاق لها هي الصلاة في جماعة بعد ما تفرقنا 

كنا بعد ما بنصلي بحس اني عايزة أخد صبحاتي كلهم بالحضن كده بحب :)) 

و كمان كنت بحس  انه في بركة في حاجات كتير بقي .. الوقت و الأكل و الصحة 

لو صلاة الجماعة  بتشد الأزر و تؤلف بين القلوب و تجيب البركة ده غير الثواب  يبقي اللي يضيعها خسران كتير 

صلوا جماعة حتي لو نساء في البيت اتجمعوا و صلوا جماعة و استشعروا جمال صلاة الجماعة 

ربنا يصلح حالنا و حالكم يا رب و ينفع بينا و بيكم و يتقبل منا و منكم صالح الأعمال 

رمضان كريم 

:)

  

زراعة الأفكار !

السلام عليكم و رحمة الله و بركاته 

كيف الحال و الأحوال ؟ و الأفندي و العيال ؟

لووووول القافية حكمت بس 

:D:D:D

أم هند بقي 

بقالي فترة انا مزاجي متعكر و حالتي النفسية مش قد كده

خصوصا لما بصحي الصبح مش بكون نشيطة و متفائلة كده كعادتي !

جيت في يوم بقي بليل قبل ما انام بقي قعدت أقول لنفسي كلام حلو 

زي : عارفة يا فاطمة إنتي تستحقي حاجات حلوة كتير بس محتاجة تشتغلي شوية كمان بس علي كذا و كذا و كذا 

تستحقي تبقي مبسوطة و المفروض تبقي مبسوطة شايفة عندك نعم كتير جميلة إزاي 

و نمت و انا بردد كلمة إنتي تستحقي كل أحلامك و امنياتك و تبقي مبسوطة 

و انا بتقلب بليل لقيت نفسي بردد نفس الكلام في عقلي 

صحيت الصبح بقي مبسوطة و متفائلة و عندي نشاط و طاقة عجيبة متعرفش جت منين !! 

إفتكرت بقي إني زرعت أفكار حلوة و طول الليل عقلي عمال يعيد و يزيد فيها و بدأ يتعامل معاها علي إنها حقائق خلاص !

الموضوع ده أول مرة عملته من كام سنة كده و إكتشفت انك ممكن تبدأ تزرع فكرة معينة في دماغ و عقلك بيستجيب بس عايز منك مداومة بقي 

عقلنا ده مشكلة كبيرة اوي يا جدع ممكن تضحك عليه و ممكن يضحك عليك و طول الوقت بقي عايشيين في دور توم و جيري 

المهم : 

إزرعوا أفكار حلوة و مبهجة في عقولكم كل يوم قبل ما تناموا .. تخيلوا الجنة و هتعملوا فيها ايه و هتقابلوا فيها مين 

 تخيلوا ضحكة طفل جميلة ملهاش مثيل 

تخيلوا فضاء أخضر واسع و أطفال بتجري و بلالين و ألوان و صوت ضحكات طفولية جميلة 

أكتبوا علي جدران عقلكم  كلام جميل : رحمة .. حب .. جمال .. ضحك .. رضا 

و أقروا الكلام ده  قبل ما تناموا 

أحلموا بتغيير الكون و حققوه قبل ما تناموا 

عقلكم هيزرع الأفكار دي و هيساعدكم تحققوها 

و قبل كل ده استعينوا بالجبار و قولوا يــــــــــــــــــــــــــــا رب 

:))) 

و ممكن كمان تعملوا زي البنوتة دي لو معندكوش مانع حد يقول عليكم مجانين

:D:D

العيش و الملح !

سؤال بسألك ايه أخرة الترحال ! 

لا ده محمد منير يا فاطمة :) 

ايوة صح :P 

بس فيه سؤال تاني بقينا كلنا نسأله مؤخرا !

ليه في زمنا ده الصداقة مبقتش زي زمان علي زمن اهالينا ؟

ليه لما نبعد منعرفش نقرب تاني ؟

و اشمعنا اهالينا و اصحابهم مهما بعدوا و اتغربوا وقت ما يتجمعوا و لا كأنهم كانوا عايشين مع بعض !!!! 

السؤال ده جنني :D:D:D 

و فجاة و انا بتكلم مع ماما في يوم كده قاعدين نحكي عن جدتي الله يرحمها 

يا إلهي انا بحب الست دي بشكل مش ممكن :D
و مامتي دي كمان جميلة بشكل ميتصدقش اصلا !! 

و فجأة خبطني إجابة السؤال !!

العيش و الملح :)

ايون العيش و الملح .. أمي و جدتي و أصدقائهم و عشرة العمر دول بقوا عشرة عمر عشان العيش و الملح 

عشان ياما قعدوا كلوا علي طبلية واحدة و اتلموا يتفرجوا او يسمعوا حاجة في الراديو مع بعض :)

عشان مكنش المهم هم هياكلوا كباب و لا حته جبنة 

المهم كانت اللمة الحلوة و الضحكة ايلي من القلب 

طب و ايه ايلي اتغير في زمنا ده يا فاطمة ؟؟

بقي في حاجة اسمها الكوفي شوب !! 

باردة و سطحية 

و مبنكونش فيها مع اصحابنا علي طبيعتنا الكاملة 

و مفيهاش عيش و ملح و دفا البيوت !

هنعمل صحاب للعمر كله لما ناكل معاهم عيش و ملح :)

بس بردو مش اي حد ياكل عيشك و ملحك لازم يبقي حد ثقة :)) 

أريد أن أصبح قطارا !

بسم الله و الصلاة و السلام علي رسول الله 

الحمد لله :)

البلوج العزيزة دي بدأتها في 2009

يوم 1\1

سعيدة بيها جدا عشان هي نعمة و الله عليا 

الكتابة فيها بتسعدني و بيسعدني أكتر انه حد يتكعبل فيها حد و يستفيد و لو بكلمة 

كان نفسي أعمل بلوج تكنيكال بس انا مش تنينة يعني بس قلت هعمل واحدة تكنيكال عشان تشجعني أكتب و أجهز و اتعلم و انشر فيها حاجات مفيدة :D:D

أمنيتي للعام الجديد إني أبقي زي القطار 

زي القطار أيلي شفته النهاردة

عندة في المقدمة نور ساطع بينور له الطريق 

عنده نقطة بداية 

عنده نقطة نهاية 

عنده محطات 

و ناس كتير بتعدي عليه لا عمره استناها و لا وقف عندها

لكن بيوصلهم للطريق  

نفسي يا رب ابقي قطار جميل يا رب

سبب توقف حياتي

بسم الله و الصلاة و السلام علي رسول الله 

مش عارفة ابدأ كلام منين الصراحة بس انا محتاجة اتكلم في الموضوع ده كتير لحد ما الاقي له علاج ....

مشكلتي في كل حاجة في حياتي دلوقتي تتلخص في الخوف من الفشل !!

انا حد بيكرة الفشل جدااااا  بكرهه لدرجة اني بخاف اقع فيه فأصبحت طول الوقت فيه :(

حاجة  محزنة بس حقيقية  للاسف
................

الخوف و القلق ده أعتقد حاجة ورثتها عن أهلي .. يعني بابا مثلا حد قلوق جدا و لما بيبقي وراه حاجة ختي لو كانت مشوار بسيط ممكن مش ينام طول الليل و لا ليلة السفر دي بتبقي عذاب مكثف لينا كلنا

بابا معندوش مانع انه يعمل  تشيك علي الشنط بتاعتنا 3 او 4 مرات عشن يتأكد انه كل حاجة تمام و مظبوطة !!

أمي العزيزة الذيذة بتبقي عاملة فيها مش قلقانة بس هي القلق بيفط و ينط من عينها
خصوصا في المواعيد بقي و تظبيط العزومات بتبقي موقفة البيت كله علي رجل :(

تخيل بقي قلق بابا +قلق ماما = اولاد عندهم قلق مرضي 

يعني انا فترة الإمتحانات خاصة العملي ممكن اروح المستشفي بقي
قولون عصبي و برد و كل حاجة ممكن تتخيلها !!

كلها بسبب نفسي مش عضوي .. ايه الحلاوة دي !

الفكرة بقي انا مش عارفة اتخلص من الموضوع ده ازاي لانه حقيقي موقفني في مكاني بقالي كتير !

وصلت بيا الفكرة اني يجيلي panic attacks 

لما ابدأ اذاكر !!!

يا للهول !! 

الفكرة أكبر من شوية قلق بتقرأ قرآن و تصلي ركعتين تقوم تبقي كويس

الفكرة في قلق بيحطك في حالة كده اقرب ما يكون لل Deadlock

و عقلي بيبطل يفكر اصلا و الخوف هو ايلي بيبقي الحاجة الوحيدة ايلي بتحركني !
لدرجة اني بحس اني مش شايفة و مش سامعة و في كوكب تاني


أعتقد إني محتاجة علاج فعلا بس أهلي مش شايفين إني محتاجة علاج :((((((((

يا رب قدرني و أخرج من الحالة دي عشان انا زهقت من الفشل و من الخوف منه و من الاحباط بتاعه 

زهقت اوووي و تعبت بجد :(

الفاضي يعمل قاضي !

بسم الله و الصلاة و السلام علي رسول الله

خبرتي في التعامل مع نفسي علمتني اني احاول  اتأمل افعالي علي قد ما اقدر عشان اعرف انا بعمل ايه و بعمله ليه و لو صح اكمل و لو غلط اصلحه 

ام هند بقي يعني 

في رحلة من رحلات التأمل دي أكتشفت اني بقيت شخص بيحكم علي الناس و بيصنفهم كمان !

يا نهار أبيض !!!

انا !! طب إزاي .. 

قعدت أفتكر نفسي في أزهي عصورها  كدهون و افتكرت ماما زمان كانت علي طول تقولي انا و اختي منحكمش علي حد و منحتقرش حد لانه حاجة زي كده هتجرح شعورهم و تزعلهم و احنا اكيد مش عايزين حد يبقي زعلان حصوصا لو احنا السبب كمان 

و الاهم من ده كله انه  احنا كنا بنشوف ماما بتتعامل ازاي مع كل الناس من كل الطبقات الاجتماعية بنفس الود و الحب و القرب !! 

" الطبقات الاجتماعية هي الحاجة ايلي كنا نقدر ندركها ساعتها "

و كمان كنت بشوفها بتتعامل ازاي مع صديقاتها المسيحيات و انها اتعرفت علي طنط مارسيل لما كانت بتوديني المدرسة و ولاد طنط مارسيل بيروحوا نفس مدرستي و بعد كده بقوا اصحاب اوي اوي و كنا بنروح عندهم و كانوا بييجوا عندنا و حضرنا معاهم كذا فرح 

و من الحكاوي ايلي كنت بسمعها في وسطهم تلخص في دماغي حاجة مهمة 

"تعددت كل حاجة و الغلب في الأنسانية واحد"

خرجت للحياة الصغنونة في الأعدادي و انا متسلحة بكل حاجة حلوة أمي علمتهالي و أهم حاجة فيهم انه الواحد لما يحكم علي الناس بالظاهر او يصنفهم او يبقي عنصري مع فئة معينة يبقي بيظلم نفسه قبل اي حد تاني 

و كملت حياتي بنفس الشكل في الثانوي 

و دي تعتبر كانت اخر مرحلة فيها بتعامل مع الناس علي انهم "ناس" و بس من غير تصنيف تاني 

و كنت حاطة في ودني كلمتين لماما زي الحلق في ودني "المهم الناس من جواهم بجد ايه و المهم انتي من جواكي بجد ايه ..و انتي بتعاملي الناس بأخلاقك انتي مش باخلاقهم هم "

ثم دخلت الجامعة  ءن ءن ءن تش 

*موسيقي تصويرية *

و مرحلة جديدة من كل ناحية و اختلاط بانواع من البشر كتير اوي و بتقضي معاهم معظم يومك 

اتلخبطت حاجات كتير جوايا و بقيت اخد حاجات ممكن تكون مش متفقة اصلا معايا و بدأت اكتشف مناطق في تفكيري و نفسي جديدة جدااااا عليا 

ثم وقوع و صدمات و اكتئاب و بعدين الواحد بدأ يتعافي و يفكر و يحلل و يتعلم و شخصيته تتبني واحدة واحدة 

بس الاساس ايلي ربيتني أمي عليه هو ايلي كان الواحد بيقبل ما يتفق معاه و يرفض ما يختلف عنه 

لكن واحدة من الأثار السلبية للمرحلة دي اني ما بيني و بين نفسي في حته من عقلي الواعي صغيرة و ربما حته اكبر في عقلي اللاواعي بدأت أصنف الناس ...

غني و فقير و كويس و وحش و مسلم و غير مسلم 

و بدأ التصنيف يبني ما بيني و بين إنسانيتي المجردة حاجز مش باين و لا واضح لكن محسوس 

لحد ما رجعت تاني اقول لنفسي التصنيف في المجمل مش حاجة سيئة لانك محتاجة تعرفي تقربي لممين و تبعدي عن مين 

 بس تبقي مع كل الناس طيبة و كويسة و علي طبيعتك عشان محدش فينا يعرف مين احسن من مين عند ربنا و ايلي انهاردة بعيد عن ربنا ممكن بكرة يبقي اقرب منك و ايلي قريب ممكن يبقي بعيد 

الفكرة بقي انه مجتمعنا غارق في التصنيف ايلي بيتطور لحد العنصرية بشكل لا يصدق !!

البيئة المحيطة دي بتأثر بشكل مش ممكن بس الحاجة الوحيدة ايلي بترد النفس هي انه الواحد يشوف الرسول عليه الصلاة و السلام كان بيتصرف ازاي في المواقف دي اكتر حاجة بتقي الواحد شرور التصنيف و العنصرية ايلي بقت تقلب بتعصب اعمي و حكم علي ظاهر الناس و عك كتير كده احنا في غني عنه ..

اعتقد البوست ده كان محاولة لتدوين التأملات دي عشان الواحد يبقي دايما مصحصح لنفسه و ميتبرمجش علي المجتمع ايلي حواليه ايلي ممكن بشكل كبير يفسد أحسن ما فيه من كتر ما السئ منتشر .

يا رب اجعلنا ممن يلقونك بقلب سليم و اجعلنا ممن تدخلهم الجنة بغير حساب 

عزيزي عزوز المنتظر :))

في مسرحية لاسعاد يونس اسمها عروسة تجنن :)

ايلي عارفها هيعرف مين عزوز ده

و كانت بتقوله جملة مضحكة جداا 

" عزعوز عريسي يا عزعوز .. هو انت ايلي مامتك داعية عليك يا عزعوزي"

و طبعا عزعوز ده ايلي هو عزوز

:D:D

المهم انا عندي رسالة لعزعوز المنتظر ده :) 

انا معرفش انت جاي امتي و يمكن متجيش و كل ده مش مهم 

المهم اني مقدرش اوعدك اني أحبك الحب ايلي يخليك عايش في الجنة 

لكن اقدر اوعدك اني هحبك في الجنة زي ما انت عايز و اكتر بس لو استحملتني في الدنيا و استحملتك 

لحد ما نوصل هناك بس 

و شكرا 

:)

حب نغفل عنه !

الحــــــــــــــــــــــب 

غير المشروط 

يعني ايلي يحبك يحبك بكل ما فيك من عيوب !

يحبك من غير ما يطلب منك في المقابل حاجة !

يحبك  بغض النظر عن شكلك او حسبك او طبقتك الإجتماعية او مستواك المادي 

 يحب الحتة الحلوة ايلي في قلبك ايلي محدش ممكن يكون شايفها غيره !

يحب شوية الخير المتغطيين بحبه زعيق و غضب ممكن !

يحبك رغم ضعفك و رغم إنه مش محتاجلك و إن إنت ايلي محتاجله 

يحبك و يفرح بيك لما تقرب و يزعل لما تبعد و يغير علي قلبك اوي اوي لو اي حد غيره دخل جواه 

 ... الحب ده ميقدرش يديهولك حد بشر زيك زيه 

لازم ايلي يدي الحب الكامل ده يبقي العظيم الرحيم الوهاب الكريم الجبار 

.....

طول الوقت ربنا بيحبنا حتي لما بنبعد عنه بيبقي بيحبنا و بيقرص ودننا كده بإبتلاء عشان نرجع نقرب تاني 

ربنا بيفرح بتوبة و رجوع العبد ليه أكتر ما العبد ما بيفرح 

عن أنس بن مالك رضي الله عنه عن النبي صلى الله عليه وسلم فيما يرويه عن ربه عز وجل، قال: ((إذا تقرب العبد إلي شبراً تقربت إليه ذراعاً، وإذا تقرب إلي ذراعاً تقربت منه باعاً، وإذا أتاني يمشي أتيته هرولة)) رواه البخاري.

ربنا بيحبنا حب مطلق .. مش مهم تخين و لا رفيع و لا غني و لا فقير و لا وزير و لا غفير .. المهم انه قلبك سليم و علي الفطرة و كله خير ..

قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ 
إِنَّ اللَّهَ لَا يَنْظُرُ إِلَى صُوَرِكُمْ وَأَمْوَالِكُمْ وَلَكِنْ يَنْظُرُ إِلَى قُلُوبِكُمْ وَأَعْمَالِكُمْ

رواه مسلم

ربنا بيحبنا و بيدبرلنا كل امورنا خير و عالم بايلي فينا و حاسس بينا و سامعنا من غير ما ننادي و مطلع علي قلوبنا وشايف كل ايلي فيها

و بيغير علي قلوبنا جدااا .. مينفعش بعد الحب ايلي ربنا بيحبهولنا ده كله و يبقي فيه في قلبنا حد بنحبه قد ما بنحب ربنا او أكتر 

انا عارفة إنه دي حاجة ممكن تحصل مننا غصب عننا مش بنبقي واخدين بالنا .. بس ربنا لو شاف حد دخل قلبك و حبيته قد او اكتر من ربنا .. ربنا هيبعدك عنه .. 

طب و بعدين يعني منحبش الناس !! ... لا طبعا نحبهم بس نبقي فاهمين انه الناس دول ما هم الا رسائل و نعم من الله علينا .. هم بيحبونا وبنحبهم عشان ربنا أنزل الحب في قلوبنا لبعض ... و ربنا قادر زي ما أنزل الحب ينتزعه من قلوبنا 

يعني من الأخر كل الخير و الحب و الرزق جايلك من عند ربنا يبقي لما تحب تشكر حد علي النعم و الحب و الخير اشكر ربنا و اشكر الناس بردو و ده جزء من شكرك لربنا 

حب الله لينا هو حب نغفل عنه في كثير من الأحيان ...

" وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُواْ لِي وَلْيُؤْمِنُواْ بِي لَعَلَّهُمْ يَرْشُدُونَ " ( البقرة 186 ) 

رحمة ربنا و حبه اقرب مليون مرة من غضبه ..اوعي لما يقع عليك ابتلاء كبير تفتكره غضب من ربنا 

أومال اعرف منين ده غضب و لا ابتلاء ؟؟

سألت ياسمين مجاهد (داعية تتحدث الإنجليزية)  في لقاء لي معها نفس السؤال ده و كانت إجابتها هي " لو المصيبة دي قربتك من ربنا أكتر تبقي إبتلاء و لو بعدتك عن ربنا تبقي غضب "

يعني احنا في ايدينا نختار انها تبقي إبتلاء او تبقي غضب !!!

بالظبط كدهون :D:D 

و إذا اردت أن تكلم الله  قم توضأ و صلي ركعتين تكن في رحاب ملك الملوك و إذا اردت أن يكلمك الله فلتقرأ ما تيسر لك من القرآن و تدبر و تأمل و ستجد غايتك فيه .

كلامي ابسط مما يجب أن يكون في الحديث عن الله سبحانه و تعالي و عن عظمة حبه لينا لكن يشفع لي ان شاء الله ما وراء التعبيرات البسيطة هو المعني.

قمة السذاجة و قمة الزيف

همممممم مش عارفة ابدأ منين كلام علي الموضوع ده 

بس انا كنت حد شايفة انه مفيش حد بطبعه شرير او ميحبلكش الخير بالقصد 

كنت بحس انه كلنا جوانا خير كتير بس بنتفهم غلط او عندنا مشاكل في التواصل 

 و بما اني مكنتش قابلت حد من الناس ايلي بيبقي عندها وشين دول او قربت منها اوي فمكنتتش حاسة انهم موجودين .. كنت عارفة انهم موجودين بس مش مدركة وجودهم لاني مشوفتهمش 

 أم هند بقي ....

عارف لما تبقي علي وشك السقوط في بلاعة و ماشي حد جنبك بتعتبره صديقك و طول الوقت بيقولك قد ايه انت حد مهم بالنسبة له و قد ايه انت حد رائع و قد ايه انت اثرت في حياته و قد ايه و قد ايه و قد ايه 

....................

و شايفك بتحط رجلك خلاص هتقع في البلاعة و يقولك يا جدع و لا يهمك حتي لو وقعت البلاعة مش غويطة اوي و بعدين انا هطلعك علي طول اصلا .. كمل مشي كده يمكن متقعش !! 

و تقع و تقع و تقع و هو جنبك  لا منه حاول ينقذك و لا منه سابك تشوف الواقع صح .. عمال بس يبيع لك اوهام و كلام حلو و في الأخر هو بيستفيد منك و بيدوس عليك و بيطلع !!

الصدمة الكبري مش في الصديق المزيف ده !! الصدمة الكبري في نفسك ايلي طلعت عبيطة جدااا و ساذجة للدرجة دي !!

لا و من كتر الكلام المعسول متكتشفش المصيبة دي الا بعد وقت طويل بعد ما يروح تأثير الكلام 

حاجة محزنة ! 

ايلي يضايق أكتر بقي انك مش عارف تعاتبه علي حاجة عدي عليها زمن و في نفس الوقت الغلطة مش غلطتة ! الغلطة غلطتك انت ايلي سمحت بان كل ده يحصل .... 

بتبقي كل ما تشوف الشخصية دي بتكره نفسك إنك سمحت لحد يوصلك لكده :((((

انا عايزة اعيط بشكل مش طبيعي 

حيطان حياتي !

عارف لما تفوق لنفسك لحظة كده و تكتشف انك بقالك كذا سنة  مبحلق في ساعة الحيط ايلي في اوضتك لدرجة انك مخدتش بالك انه بقيه الحيطان في اوضتك فاضية و ممكن تتملي بحاجات كتير حلوة اوي بس انت ايلي مش واخد بالك و مضيع عمرك مبحلق في ساعة الحيط  !!! 

لا كمان و المصيبة تطلع مبحلق في الساعة و الساعة اصلا واقفة !! 

يا خبر أبيض !!

الدنيا سباق جري !

بسم الله و الصلاة و السلام علي رسول الله 

الدنيا  دي عاملة زي سباق الجري بالظبط ..

ايلي ميركزش في طريقه يخسر ..

و ايلي ميونش طموحه عالي يخسر ..

و ايلي ميكونش واثق في ربه و في نفسه بردو يخسر ...

طب  و ايلي  الدنيا وقعته في وسط السباق علي وشه يعمل ايه ؟؟ هيخسر !!  !! 

مش هقولكم هيعمل ايه .. هخلي الفيديو ده يقولكم هيعمل ايه 

ساعات الدنيا بتدينا هدايا حلوة اوي اوي و حاجات محتاجيها بس متغلفة بشكل  وحش اوي عشان بردو تعلمنا انه منبصش للشكل ندور في المعني و الجوهر بس الاكيد انها الخير لينا لانه  مفيش حاجة بتيجي من عند الله الا و هي خير 

البنت ايلي في الفيديو يمكن لو مكانتش وقعت مكنتش كسبت السباق !!

الوقوع  ساعات بيخلق جوانا دافع قوي انه نقوم و نرجع للطريق و نكسب كمان 

يبقي خلي وقوعك دايما دافع انك تكسب .

كمل جري  و متفكرش مين راح يسبق 

خليك فيك انت و بس .. انت و بس 

وَفِي ذَلِكَ فَلْيَتَنَافَسِ الْمُتَنَافِسُونَ

بسم الله و الصلاة و السلام علي رسول الله 

كيفكم ؟؟ .. 

ايون ملاحظة نشاطي الزايد في الكتابة علي البلوج .. بس انا هعتبر ده شئ كويس يعني 

ام هند ندخل في المفيد ..

العشر الاواخر من رمضان و ليلة القدر و ما شاء الله الشهر بيجري جري السنين كده و فجأه هنلاقي  العيد خبط علي بابنا 

الصراحة انا زيي زي ناس كتير مش مبسوطة من ادائي في رمضان لحد دلوقتي .. 

قلت يبقي مفيش غير انه حد يشجعني و نشد مع بعض و ربنا يكرمنا كدهون 

 بصيت يمين .. بصيت شمال .. لقيت البنت اختي ..

قلت ايوووون هي دي !!

طب و بعدين !!

قلت عشان اشجعها و اشجعني   اتفقنا علي حاجات هنعملها مع  بعض و حاجات هنتنافس فيها مع بعض و ايلي هيكسب التاني هيجيله الهدية ايلي هو عايزها :D:D 

و هنا حضرتني الأية الكريمة 

{وَفِي ذَلِكَ فَلْيَتَنَافَسِ الْمُتَنَافِسُونَ}

و ايلي تفسيرها :

الحمد لله والصلاة والسلام على رسول الله وعلى آله وصحبه، أما بعـد: 

فإن التنافس في الشيء هو الرغبة فيه، والمغالاة في طلبه والتزاحم عليه، كذا قال ابن جرير في تفسيره والمراد بقوله وفي ذلك: هو النعيم، أو الرحيق كما قال البيضاوي، وقالالسعدي ـ رحمه الله: وفي ذلك النعيم المقيم الذي لا يعلم حسنه ومقداره إلا الله فليتنافس المتنافسون أي يتسابقوا في المبادرة إليه بالأعمال الموصلة إليه، فهذا أولى ما بذلت فيه نفائس الأنفاس وأحرى ما تزاحمت للوصول إليه فحول الرجال. انتهى.

المصدر :

http://www.islamweb.net/fatwa/index.php?page=showfatwa&Option=FatwaId&Id=157589

قلت اشاركم الفكرة كدهون بقي و ايلي عنده اخ او اخت او صديق يشجعوا بعض و ينطلقوا و ربنا يتقبل منكم و منا صالح الاعمال و يبلغنا ليلة القدر و يصلح حالنا و احوالنا جميعا 

السحور و الفجر !

بسم الله و الصلاة و السلام علي رسول الله 

ازيكم يا حلوين ؟ 

رمضان الجميل بيجري جري و احنا مش ملاحقين :(

ام هند بقي ندخل بقي في الموضوع  !

و انا قاعدة أتسحر من كام يوم كدهون و زيي زي كل الناس صاحين و بيتسحروا !

قلت لنفسي  يعني يا فاطمة كل الناس صاحيين !! الشباب و الكبار و الصغار عشان يتسحروا !!

راحت فاطمة ردت عليا و قالتلي : طبعا يا بنتي ! ده الصيام السنة دي 16 ساعة بحالهم ايلي مش هيتسحر هيتعب اوي اوي طول اليوم !

رديت و قلتلها : سبحان الله يعني الناس دي بتصحي في التوقيت ده عادي عشان تتسحر في رمضان و مبيصحوش فيه عادي في غير رمضان عشان يصلوا الفجر !! دي حاجة عجيبة جدا 

ردت فاطمة و قالتلي :  همممم تصدقي فعلا عندك حق دي حاجة تستحق التفكير !

رديت و قلتلها : الموضوع مش معقد اوي كده يعني ! الناس بتصحي تتسحر عشان مدركة انها عندها جسد و له احتياجات و محتاج غذاء ! لكن مش مدركة انه لها نفس و روح محتاج غذاءها بردو في نفس التوقيت ده و انها لو محصلتش عليه في التوقيت ده تفضل طول اليوم جعانة .. الصلاة هي الغذاء ايلي روحنا بتحتاج له و صلاة الفجر دي عاملة زي وجبة السحور كده بالظبط لو مش اخدتها يومك هيبقي متعب اوي !!

ردت فاطمة و قالتلي : بس اهالينا كانوا يقولولنا الصلاة و لازم نصلي بس مش قالولنا ليه احنا محتاجين نصلي قبل ليه احنا لازم نصلي !

رديت و قلت لها : بالظبط كدهون احنا ايلي محتاجين نصلي عشان  روحنا دي من عند الله و عشان تشحن طاقتها لازم تتواصل مع خالقها :) 

ردت فاطمة و قالتلي : في حاجة كمان فينا محتاجة غذاء و احنا ناسينه علي فكرة .

رديت و قلتلها : حاجة ايه دي ؟ !

قالتلي : عقلنا يا بنتي عقلنا :) 

قلت لها : ايون صح عندك حق يا بنتي و الله عقلنا محتاج غذاء بردو ايلي هو القراءة !!

و سكتت فاطمة شوية تقريبا نامت او حاجة !!

و قعدت انا أفكر شوية !! 

اول حاجة هعلمها لولادي في المستقبل ان شاء الله 

انه الواحد فينا عبارة عن 3 حاجات في بعض.. واحدة منهم بنشوفها و اتنين مش بنشوفهم 

احنا  روح و عقل و جسد ..

لازم نهتم بيهم مع بعض و نغذيهم افضل غذاء عشان تبقي صحتنا كويسة :) 

 هروح انا بقي اشوف فاطمة راحت فين :)))

سلام :)

ماء زمزم !

ماء زمزم !! 

في خلال السنة ايلي فاتت كنت مشتاقة اني اعمل عمرة جدا جدا جدا و كان نفسي في ماء زمزم بشكل مش ممكن قعدت اسأل محدش رايح عمرة يجيبلي معاه ماء زمزم !! 

لحد ما قابلت زميلة في الكلية في يوم  مامتها رجعت من عمرة قريبا و بالصدفة البحتة معاها زجاجة ماء زمزم و اديتني  بق واحد و في اخر اليوم اديتني حوالي نص الازازة ايلي كانت معاها :) 

 اللــــــــــــه كنت فرحانة اوي انه ربنا بعتلي ماء زمزم ايلي كان نفسي فيه و كمان من غير ما اطلبه مخصوص من حد  

لما خلصت ماء زمزم بقي انا زعلت اوووي و كان نفسي تاني في ماء زمزم 

معداش اسبوع و واحدة صديقة أمي  رجعت من العمرة و جابت لنا جركن ماءزمزم صغنون 

اللــــــــــــه عليك يا اكرم الاكرمين .. يا حبيبي يا الله 

و تخلص ماء زمزم و أكون في هذه اللحظات بمر بحالة و تجربة صعبة و حالتي النفسية مدمرة تقريبا 

و أكون بكلم خالي علي التليفون و يقولي علي فكرة ياسمين مجاهد هتعمل عمرة و تعدي علي مصر تقعد أسبوعين كده 

لحد دلوقتي الموضوع بالنسبة ليا عادي يعني !! 

لحد ما جه اليوم ايلي هروح اخدها من بيتها هنا في مصر عشان تقضي اليوم معانا و مع العائلة و كده 

لما رحت اجيبها قالتلي انا جبتلكم هدية ماء زمزم و تمر ... انا كنت هعيط من الفرحة اصلا ..  يا رب انت عالم بحالي و غني عني و عن سؤالي دائما و ابدااااا

و في الطريق الي بيتنا بقي قعدت اتكلم معاها عن المقالات ايلي بتكتبها و الحلقات ايلي بتديها و اندمجنا اوي اوي  و حسيت انه احنا حاسين ببعض اوي 

و بعد ما روحنا و قعدنا مع العائلة و روحوا و هي قررت تبيت عندنا في اليوم ده قعدت انا و هي ندردش كده شوية 

و اكتشفت انه رحلة العمرة دي مكنتش محسوبة و لا متخطط لها دي جت لها كده بترتيب ربنا 

ساعتها حسيت انه ربنا جابهالي مخصوص من امريكا عشان ماء زمزم و عشان انا كنت محتاجة حد نتكلم كده مع بعض و نحل مشكلتي حتي من غير ما نتكلم عن المشكلة !! 

يبقي ربنا أكيد بيحبني اوي 

الحمد لله .. الحمد لله .. الحمد لله 

كل واحد أكيد عدي عليه  مواقف حس بيها انه ربنا جنبه و سانده و بيطمنه و يطبطب عليه 

كل ما يحصلك موقف من دول أكتبه .. عشان لما تضيق الدنيا بيك او تحس انك بعدت عن الطريق ترجع تقراهم و يذوب قلبك لما تشوف ربنا بيحبك ازاي 

...

 و حاجة كمان ممكن تكون المواقف دي بتحصلك طول الوقت بس انت ايلي مش واخد بالك او مركز .. حاول تركز شوية هتلاقي حب ربنا ليك موجود طول الوقت و في كل لحظة بس انت ايلي مش واخد بالك 

 ربنا ينور بصيرتنا جميعا و يرشدنا للطريق الصح دائما 

الثقة في النفس و تقدير الذات !

عزيزتي ياسمين مجاهد في بث  علي الراديو قريبا كانت تجيب عن اسئله الناس و كان سؤال  احدي المستمعين كيف اتعامل مع الحزن و مع   My self-esteem  

خاصة عندما ينخفض تقديري لذاتي و ثقتي بنفسي بسبب حدث ما 

و كانت اجابتها كالتالي :

"

في البداية عليك ان تجد ما هو مصدر تقديرك لذاتك ؟؟ .. هل هو رأي الناس ؟؟ هل هو مستواك الاجتماعي او الثقافي او المادي او التعليمي ؟؟ 

اذا كانت هذه الاشياء هي المصدر الرئيسي و الاساسي لثقتك بنفسك فانت الان في مشكلة 

لانه المصدر الرئيسي لتقدير لذاتك يجب ان يكون علاقتك مع الله  و هل تتقدم في علاقتك و ترقي و تقترب ام تتراجع 

و ليكن كل شئ فيما عدا ذلك هو مصدر ثانوي لثقتك بنفسك و تقديرك لذاتك

"

اللهم اهدنا الي طريق الصواب و ردنا اليك مردنا جميلا و عزنا بك و لا تذلنا و لا تحوجنا الا لك 

 الحمد لله .

متي ينتهي الدرس !

بسم الله و الحمد لله و الصلاة و السلام علي رسول الله

  

ما اجمل أن يعلمك و يربيك من هو أعلم بك منك و من امك  و أبيك  !! ....

يا حبيبي يا الله ! من لنا سواك تعلم ما تخفي الصدور ...

بنمر في حياتنا بتجارب  و مواقف كتير حلوة و وحشة و الهدف منها بيبقي انه نتعلم !! و الحكمة منها انه نقوي ايمانا و علاقتنا بخالقنا و نكتشف ضعفنا و قلة حيلتنا و انه ملناش غير ربنا سبحانه و تعالي .

من تجربتي المتواضعة في الحياة أكتشفت انه ربنا سبحانه و تعالي خير مُعلم .. لما بيحطنا في موقف صعب عشان نتعلم منه و يعدي الموقف و تعدي ايام و سنين ..  يرجع ربنا يحطنا في موقف مشابه عشان يختبر هل احنا فعلا تعلمنا الدرس صح من المرة السابقة !! و لا لسه الموضوع ده محتاج تاكيد و شغل تاني عليه !! 

لو نجحنا في الاختبار ده يبقي تعلمنا الدرس و لو منجحناش في الاختبار ده بيفضل يتعاد الاختبار ده لحد ما نتعلمه  صح و نتقنه و يصبح جزء منا وو نصبح جزء منه 

الحمد لله علي فضله و رحمته و حبه و كرمه و تعليمه ليا و ادعوه ان يوفقني في استيعاب الدروس بسرعة و يسر 

اللهم لك الحمد حتي ترضي و لك الحمد اذا رضيت و لك الحمد بعد الرضا 

متبقاش بخيل يا جدع :D

احم احم .. كيف حالكم ؟

عايزة اكتب انا البوست ده بقالي كتير بس الامتحانات بقي نعمل ايه :))

ام هند بقي 

ايه الموضوع ايلي خلاني أجي هنا ...

 هو حضرتك يا فندم و لا حضرتك يا فندمة .. بتشوف وشك كام مرة في اليوم ؟؟

 مش كتير اوي يعني  هم بس الكام مرة ايلي انت\انتي بتبصوا في المراية .. صح .؟

 طويب 

بس ايلي حواليك بيشوفوا وشك  طول اليوم يعني صح ؟

.....

حد قالك قبل كده ضحكتك حلوة .؟ ابتسامتك تجنن ؟؟ .. ياااه الدنيا بتبقي مشرقة و انت فاتح الشيش مش مركب الوميتال :D??

.....

 يا ستي انجزي .. عايزة ايه من ابتسامتي و ضحكتي ؟؟ انتي مالك بيهم يعني ؟؟ هم كانوا بتوعك !!

ايوووووون دول بتوعي انا اصلا :D:D

.....

 بتهزري علي الصبح كده مش فايقين لك :X 

.....

استني بس واحدة واحدة كده معايا .. لما انت مش بتشوف وشك كتير و عندك ابتسامة تحفة و تجنن يبقي ربنا خلي ابتسامتك كده ليه عشانك ؟؟ اذا كنت انت مش هتشوفها اصلا غير كام مرة في اليوم و يمكن متشوفهاش خالص لو مشغول .. ابتسامتك التحفة دي و ضحكتك ايلي تجنن دي بتاعت الناس ايلي حواليك .. لا و ايه كمان تبسمك في وجه اخيك صدقة .. يعني حاجة مش بتاعتك اصلا و لما بتديها بتاخد عليها ثواب !!! 

متبقاش بخيل علي نفسك و بخيل علي غيرك :))

متبخلش علي نفسك بالثواب و متبخلش علي حد بابتسامتك يمكن تكون هي الحاجة الوحيدة ايلي بتهون عليهم مرار الحياة و صعوبتها .. يمكن ابتسامتك تفتح في وشهم أبواب أمل توصلهم لبر الأمان 

خد بأيد الناس و أبتسم لهم :))

شوف بقي أنت ممكن تغير الدنيا و أنت ساكت و من غير مجهود بس بأبتسامة صغنونة حنينة من القلب 

صباحكم و مسائكم أشراق ابتسامات :D

رحلة داخل عماميق عماميقي :)

رحلة الي مركز الارض !!

لووول لا  هو في الواقع رحلة بحث داخل اعماق نفسي لبحث مشكلة بتؤثر و تعوق تقدمي الشخصي طول الوقت 

في الحقيقة البحث ده انا عملته مع نفسي بقالي كتير يعني و كل شوية ازود عليه و افهمه  اكتر 

 ام  هند بقي :D:D

المشكلة الحالية : مبعرفش اسأل لو محتاجة مساعدة في حاجة في الكلية او لما حد بيتكلم ساعات عن حاجات انا معرفهاش و انا شايفه اني المفروض ابقي عارفة ده ببقي محرجة من نفسي جدا قدام نفسي 

أسباب المشكلة المعروفة الي الأن :

لما كنت صغيرة و في ابتدائي  كان بابا بيقعد يذاكر معايا بقي كل المواد و مش بس بنذاكر ايلي اخدناه لا كمان بنقعد نحضر الدروس ايلي هناخدها تاني يوم .. طبعا دي تبدو حاجة حلوة جدا و بالفعل هي حاجة حلوة جدا ساعتها .. لاني بسبب بابا تقريبا كنت اشطر بنت في الفصل و أكتر بنت المدرسين بيحبوها .. خصوصا كمان لما يسألوا  علي حاجة برة المنهج و يلاقوني عارفاها  و كل ده كانت معلومات بابا صحيح- بس في المدرسة دي كنت انا -.. و الموضوع دي سبب مشكلة لاختي حتي لانها لما دخلت نفس مدرستي  و هي كانت بتحب تلعب يعني و مش بتركز اوي في المذاكرة .. كل المدرسين بتوعنا كانوا بيغلطوا في اسمها و يقولولها يا فاطمة ساعات و علي طول يقولولها انتي ليه مش زي اختك !! -البنت اتعقدت بسببي يا حرام -  .. طب و القصة دي ازاي كانت سبب من اسباب مشكلتي !! 

كانت سبب لانه صورتي ايلي كونتها انا شخصيا عن نفسي و أهلي و مدرسيني كمان كونوها عني اني شاطرة جدا و بجاوب علي اسئله كتير من غير حتي ما تكون متعلقة بالمنهج او اتقالت في المدرسة .

بردو ازاي دي سبب من أسباب المشكلة ؟؟ 

  استنوا بس هتعرفوا لما اخلص كل الاسباب :))

همممم ايه كمان ؟ 

 ثاني حاجة بقي : لما عدت سنة أولي في الكلية  .. كانت أصعب حاجة فيها انه  ايلي حصل عكس تماما صورتي ايلي واخداها عن نفسي .. غالبا مكنتش فاهمة و لا مستوعبة الفكرة دي تماما .. وبدأت ارسم صورة عن نفسي تاني عكس تماما الصورة الاولانية ايلي اتكسرت و ايلي طبعا مش صح لانها كانت رد فعل لموقف هز حياتي كلها .. وأظن اني لسه بعاني من الصورة السلبية ايلي رسمتها عن نفسي ساعتها لحد دلوقتي .. 

 الفكرة بقي انه صورتي عن نفسي دلوقتي هي مزيج بين الصورتين دول و ما اصعبه مزيج  .. !!! 

بيخليني أفكر بالشكل ده : لما بتتعرض قدامي معلومات جديدة  ببدأ أفكر انه واو حلو اوي ده !! بس ازاي انتي مش عارفة المعلومات دي !! ما هو طبعا حضرتك ضايعة و مقصرة و مش بتقري كفاية و  .. و .. و ... الي أخر الخناقة العبقرية دي 

همممممم طبعا في أسباب تانية صغيرة و مليانة تفاصيل بس هم دول أكبر سببين يعني 

 الحل بقي : بحاول أقنع نفسي اني متولدتش عارفة كله حاجة و بعدين مش أحسن لك لما تباني جاهلة بالشئ فالناس يعلموكي .. أحسن ما تفضلي ساكتة كده لا منك اتعلمتي و لا منك راضية عن نفسك !! 

قولي لا مش عارفة :)) علموني  و انتي من جواكي مش بتفكري في اي حاجة غير في أحساسك لما هتتعلمي قد ايه هتكوني مبسوطة 

أستمتعــــــــــــــــــي بطلب العلم من كل حد حواليكي 

ربنا يهديكي يا فاطمة :)