متي ينتهي الدرس !

بسم الله و الحمد لله و الصلاة و السلام علي رسول الله

  

ما اجمل أن يعلمك و يربيك من هو أعلم بك منك و من امك  و أبيك  !! ....

يا حبيبي يا الله ! من لنا سواك تعلم ما تخفي الصدور ...

بنمر في حياتنا بتجارب  و مواقف كتير حلوة و وحشة و الهدف منها بيبقي انه نتعلم !! و الحكمة منها انه نقوي ايمانا و علاقتنا بخالقنا و نكتشف ضعفنا و قلة حيلتنا و انه ملناش غير ربنا سبحانه و تعالي .

من تجربتي المتواضعة في الحياة أكتشفت انه ربنا سبحانه و تعالي خير مُعلم .. لما بيحطنا في موقف صعب عشان نتعلم منه و يعدي الموقف و تعدي ايام و سنين ..  يرجع ربنا يحطنا في موقف مشابه عشان يختبر هل احنا فعلا تعلمنا الدرس صح من المرة السابقة !! و لا لسه الموضوع ده محتاج تاكيد و شغل تاني عليه !! 

لو نجحنا في الاختبار ده يبقي تعلمنا الدرس و لو منجحناش في الاختبار ده بيفضل يتعاد الاختبار ده لحد ما نتعلمه  صح و نتقنه و يصبح جزء منا وو نصبح جزء منه 

الحمد لله علي فضله و رحمته و حبه و كرمه و تعليمه ليا و ادعوه ان يوفقني في استيعاب الدروس بسرعة و يسر 

اللهم لك الحمد حتي ترضي و لك الحمد اذا رضيت و لك الحمد بعد الرضا 

متبقاش بخيل يا جدع :D

احم احم .. كيف حالكم ؟

عايزة اكتب انا البوست ده بقالي كتير بس الامتحانات بقي نعمل ايه :))

ام هند بقي 

ايه الموضوع ايلي خلاني أجي هنا ...

 هو حضرتك يا فندم و لا حضرتك يا فندمة .. بتشوف وشك كام مرة في اليوم ؟؟

 مش كتير اوي يعني  هم بس الكام مرة ايلي انت\انتي بتبصوا في المراية .. صح .؟

 طويب 

بس ايلي حواليك بيشوفوا وشك  طول اليوم يعني صح ؟

.....

حد قالك قبل كده ضحكتك حلوة .؟ ابتسامتك تجنن ؟؟ .. ياااه الدنيا بتبقي مشرقة و انت فاتح الشيش مش مركب الوميتال :D??

.....

 يا ستي انجزي .. عايزة ايه من ابتسامتي و ضحكتي ؟؟ انتي مالك بيهم يعني ؟؟ هم كانوا بتوعك !!

ايوووووون دول بتوعي انا اصلا :D:D

.....

 بتهزري علي الصبح كده مش فايقين لك :X 

.....

استني بس واحدة واحدة كده معايا .. لما انت مش بتشوف وشك كتير و عندك ابتسامة تحفة و تجنن يبقي ربنا خلي ابتسامتك كده ليه عشانك ؟؟ اذا كنت انت مش هتشوفها اصلا غير كام مرة في اليوم و يمكن متشوفهاش خالص لو مشغول .. ابتسامتك التحفة دي و ضحكتك ايلي تجنن دي بتاعت الناس ايلي حواليك .. لا و ايه كمان تبسمك في وجه اخيك صدقة .. يعني حاجة مش بتاعتك اصلا و لما بتديها بتاخد عليها ثواب !!! 

متبقاش بخيل علي نفسك و بخيل علي غيرك :))

متبخلش علي نفسك بالثواب و متبخلش علي حد بابتسامتك يمكن تكون هي الحاجة الوحيدة ايلي بتهون عليهم مرار الحياة و صعوبتها .. يمكن ابتسامتك تفتح في وشهم أبواب أمل توصلهم لبر الأمان 

خد بأيد الناس و أبتسم لهم :))

شوف بقي أنت ممكن تغير الدنيا و أنت ساكت و من غير مجهود بس بأبتسامة صغنونة حنينة من القلب 

صباحكم و مسائكم أشراق ابتسامات :D

رحلة داخل عماميق عماميقي :)

رحلة الي مركز الارض !!

لووول لا  هو في الواقع رحلة بحث داخل اعماق نفسي لبحث مشكلة بتؤثر و تعوق تقدمي الشخصي طول الوقت 

في الحقيقة البحث ده انا عملته مع نفسي بقالي كتير يعني و كل شوية ازود عليه و افهمه  اكتر 

 ام  هند بقي :D:D

المشكلة الحالية : مبعرفش اسأل لو محتاجة مساعدة في حاجة في الكلية او لما حد بيتكلم ساعات عن حاجات انا معرفهاش و انا شايفه اني المفروض ابقي عارفة ده ببقي محرجة من نفسي جدا قدام نفسي 

أسباب المشكلة المعروفة الي الأن :

لما كنت صغيرة و في ابتدائي  كان بابا بيقعد يذاكر معايا بقي كل المواد و مش بس بنذاكر ايلي اخدناه لا كمان بنقعد نحضر الدروس ايلي هناخدها تاني يوم .. طبعا دي تبدو حاجة حلوة جدا و بالفعل هي حاجة حلوة جدا ساعتها .. لاني بسبب بابا تقريبا كنت اشطر بنت في الفصل و أكتر بنت المدرسين بيحبوها .. خصوصا كمان لما يسألوا  علي حاجة برة المنهج و يلاقوني عارفاها  و كل ده كانت معلومات بابا صحيح- بس في المدرسة دي كنت انا -.. و الموضوع دي سبب مشكلة لاختي حتي لانها لما دخلت نفس مدرستي  و هي كانت بتحب تلعب يعني و مش بتركز اوي في المذاكرة .. كل المدرسين بتوعنا كانوا بيغلطوا في اسمها و يقولولها يا فاطمة ساعات و علي طول يقولولها انتي ليه مش زي اختك !! -البنت اتعقدت بسببي يا حرام -  .. طب و القصة دي ازاي كانت سبب من اسباب مشكلتي !! 

كانت سبب لانه صورتي ايلي كونتها انا شخصيا عن نفسي و أهلي و مدرسيني كمان كونوها عني اني شاطرة جدا و بجاوب علي اسئله كتير من غير حتي ما تكون متعلقة بالمنهج او اتقالت في المدرسة .

بردو ازاي دي سبب من أسباب المشكلة ؟؟ 

  استنوا بس هتعرفوا لما اخلص كل الاسباب :))

همممم ايه كمان ؟ 

 ثاني حاجة بقي : لما عدت سنة أولي في الكلية  .. كانت أصعب حاجة فيها انه  ايلي حصل عكس تماما صورتي ايلي واخداها عن نفسي .. غالبا مكنتش فاهمة و لا مستوعبة الفكرة دي تماما .. وبدأت ارسم صورة عن نفسي تاني عكس تماما الصورة الاولانية ايلي اتكسرت و ايلي طبعا مش صح لانها كانت رد فعل لموقف هز حياتي كلها .. وأظن اني لسه بعاني من الصورة السلبية ايلي رسمتها عن نفسي ساعتها لحد دلوقتي .. 

 الفكرة بقي انه صورتي عن نفسي دلوقتي هي مزيج بين الصورتين دول و ما اصعبه مزيج  .. !!! 

بيخليني أفكر بالشكل ده : لما بتتعرض قدامي معلومات جديدة  ببدأ أفكر انه واو حلو اوي ده !! بس ازاي انتي مش عارفة المعلومات دي !! ما هو طبعا حضرتك ضايعة و مقصرة و مش بتقري كفاية و  .. و .. و ... الي أخر الخناقة العبقرية دي 

همممممم طبعا في أسباب تانية صغيرة و مليانة تفاصيل بس هم دول أكبر سببين يعني 

 الحل بقي : بحاول أقنع نفسي اني متولدتش عارفة كله حاجة و بعدين مش أحسن لك لما تباني جاهلة بالشئ فالناس يعلموكي .. أحسن ما تفضلي ساكتة كده لا منك اتعلمتي و لا منك راضية عن نفسك !! 

قولي لا مش عارفة :)) علموني  و انتي من جواكي مش بتفكري في اي حاجة غير في أحساسك لما هتتعلمي قد ايه هتكوني مبسوطة 

أستمتعــــــــــــــــــي بطلب العلم من كل حد حواليكي 

ربنا يهديكي يا فاطمة :)

حمقاء .. لا تدري !

لوحة  في متحف علي الجدران .. انا 

قصيدة شعر معلقة علي جدار .. انا 

كقطعة أثاث في معرض .. او حتي كتاب علي رف 

 يمرون بي ! يتأملونني .. يحدقون في  و ربما يتصفحوني  ... وتلمع أعينهم بلمعة لا افهمها 

ثم ينصرفون !

لا أدري أينصرفون بعد النظر الي  السعر فيجدونني باهظة الثمن !

أم ينصرفون لانهم لم يجدوا غايتهم في المحتوي !

 أم ينصرفون لانهم وجدوا غايتهم في المحتوي و لكن الشكل لا يناسب المحتوي !

أم ينصرفون فحسب .. لانهم لم يكن في نيتهم الشراء من البداية 

أم أنني حمقاء !! فلا هذا مكان للبيع و الشراء و لاهؤلاء  يشترون و لا انا لوحة او قصيدة او كتاب .

اذا من أكون ؟؟ و لماذا يقتربون و يحدقون هكذا ؟

لا أدري .. لكن كل ما أعرفه عني أنني حمقاء لا تدري .

نعم .. انا حمقاء لا تدري 

لا تدري ...

Just Like This Flower !

تجربة 1 :ماذا لو كان هذا أخر يوم في عمري #اليوم_الأول

السلام عليكم و رحمة الله و بركاته

الفترة الأخيرة دي حسيت انه ادائي في الحياة بشكل عام مش بالمستوي ايلي يجب ان يكون وخصوصا في صلاتي

فبدات أفكر ازاي أحسن أدائي ده في كل الجوانب ايلي عايزة تظبيط جامد خصوصا انه داخله علي تيرم تقيل في الكلية و محتاجة أكون شعلة نشاط و لا مجال لاحباط او كسل او اي شعور سلبي .

نطت في دماغي فكرة ! -لمبة منورة- قلت لنفسي تعالي نتخيل انه انهاردة و كل يوم هو أخر يوم في حياتك و نشوف الفكرة دي هتأثر ازاي علي أدائي في الحياة !!

الحلو في الفكرة انه دي حقيقة ممكن انهاردة او بكرة او اي يوم جاي يكون هو فعليا أخر يوم في حياتي !

نتيجة اليوم الاول :

• بدأت أدرك انه فيه حاجات كتير بكروتها في حياتي لكن محتاجة مني صبر عشان ابقي باتقن فيها العمل
• انه يومي فعليا متغيرش فيه حاجات كتير لانه الواحد متعود علي نظام معين و مش ممكن يتغير في يوم و ليله بالرغم من وجود الفكرة في دماغي انه ده اخر يوم ليا !
• أنا مش حد صبور كفاية عشان كده بمل بسرعة و الدنيا بتبوظ مني
• مش هوقف التجربة علي اليوم ده لا هفضل أكررها لحد ما فعليا ابقي أحسن

يـــــــــــــــــــــــــــا رب أنت المستعان

كائن يستحق ضرب القباقيب

كل يوم بعيشه جوا مجتمعنا ده و بقابل فيه رجالة او كما يقال يعني انهم رجالة بحس قد ايه هم كائنات صعب وصفها الصراحة :S:S

كعادتي راكبة المترو يعني المهم واحدة ست معاها اختها و معاهم اطفال و شنط كتر .. المهم يعني الجو كان حر قوي اليوم ده .. راحت بنوته معاهم صغننه اغمي عليها قبل محطتهم ايلي المروض نازلين فيها .. ارتبكوا جدا بقي و اتلهو في البنت المغمي عليها ...

المهم البنت فاقت الحمد لله بس عقبال ما لموا حاجتهم و جم ينزلوا خرجوا شنطتين برا المترو و ملحقوش ينزلوا ..

المهم المحطة ايلي بعدها دي كانت محطتي انا .. انا حسيتهم غرقانين في شبر ميه قلت هوصلهم لمحطتهم و ابقي ارجع تاني ان شاء الله .. المهم شلت معاهم الشنط و كده و نزلنا و بعدين خدتهم و عدينا الناحية التانية عشان نرجع للمحطة ايلي قبلها

قالك بقي كان راكب معاهم في نفس المترو زوج واحدة الستات دول

المهم بقي كان ايه رد فعل الراجل لما قابلهم في محطتهم لما رجعنا -تاني بتقولي راجل يا فاطمة - قصدي الكائن ده

بيزعقلهم و بيقولهم انتم قرفتوني و تاعبني معاكم ..

راحت أخت مراته بتقوله .. بنتك اغمي عليها و تعبت و كده و اتلخمنا فيها .. راح قايل : كنتوا رمتوها من المترو و خلصتونا

آآآآآآآآآآآآآآآآآآآآآآه يا كائن .. دا انا قلت اول ما هيشوفهم هياخدهم في حضنه و يطبطب عليهم و يطمن انهم بخير

هو الكائنات دي معندهاش احساس .. الكائنات دي مش زي اي كائن في الدنيا عنده مشاعر علي الاقل تجاه فلذه كبده

هي الكائنات دي ليه كتير كده و ايه ايلي جابها كوكب الارض .. او انا ايه ايلي جابني كوكب الارض

.............

هو راح فين الأب و الزوج و الرجل ايلي عنده احساس و بيحب و يموت في ولاده و زوجته و بيرق و يتأثر بأي حاجة انسانيا مؤثرة

فين الحنية و الحب و المودة و الرفق ؟؟ فين الأحساس ؟؟

انا حقيقي عايزة اعيط و مش عايزة اقابل كل شوية كائن من دول .. :(((((((((((