فويطمــــــة

قصة حب

2012-01-30T17:02:00.002+02:00

بلغ الثلاثين من عمره و لم يكن يفكر بالزواج .. ينفق راتبه الشهري علي ادخال السرور علي نفسه من شراء احذية فقد كان محب

لجمع الاحذية حتي و ان كان يعلم انه لن يرتديها .. و كان محبا للفاكهة بكل انواعها و يشتري منها اقفاصا!!

حتي دفعوه اخوته دفعا للزواج حتي يجد من يعتني به عندما يتقدم به السن

.. فخطب فتاه بسيطة جدا تبدو ملامحها كملامح اهل شرق اسيا جسدها نحيل و بسمتها جميلة

بني لها منزلا بسيط لكن جميل و دافئ و تدخله الشمس كل يوم فتنير ايامهم و تدفئ قلوبهم

تزوجها في حفل كبير من جموع اهله و اهلها واخذها الي عش العصافير

مررت سنوات و كانهم عرسان جداد

مرضت هي بالفشل الكلوي و هلكهم اللف في المستشفيات .. و بعدها اكتشفوا عدم قدرتها علي الانجاب

كل ذلك و لم يمر 5 او 6 سنوات علي زواجهم .. !!

فماذا فعل هو !!

لم يفعل شيئا سوي الابتسام و القاء النكات و حمد الله علي نعمه و احتضنها كبنته

.. كان يوصلها للمستشفي في ايام الغسيل الكلوي المؤلم و يعود لياخذها و

و بين الحين و الاخر يساعدها في المطبخ و اعمال المنزل و لو رأيته لكنت استعجبت من ابتسامه الرضا و الحب علي وجهه

و بعد زواج دام 17 عام و هو محب لزوجته و صابر و راضي علي مرضها و علي عدم قدرتها علي الانجاب

لقد مرض هو مرضا شديدا و بقي شهرا في المستشفي

و اصبحت هي من ترعاه و تلازمه

كان كلما اشتد به الالم او التعب امسك بيدها و نظر في عينيها باكيا و هو يقول لها "هو خلاص كده !!" و بالطبع تبكي هي بكاءا شديدا ملهاش في الدنيا غيره ونيس و لا حبيب و لا اب و لا اخ و لا ابن

و هو ملوش غيرها بنته و حبيبته و زوجته و صديقته و كل شي تتمحور حياته حولها

.......

انتقل الي رحمه الله

و مازال محبا مخلصا وفيا .. زارني في حلم و روحه تلف حولها ترعاها و تلازمها و تطمئن علي احوالها

رحمك الله يا عمي و رزقك الفردوس الاعلي بجوار رسول الله صلي الله عليه و سلم

وحشتني <3

حاجة غريبة .. حاجة غريبة

2012-01-02T23:43:00.002+02:00

عايزة اتكلم عن الموضوع ده عشان شاغلني شويتين

ساعات بنحس اننا مش قادرين نتعامل مع الناس او نتفاعل معاهم خصوصا لو مكتئبين يعني بس بتبقي فترة و بتعدي يعني و بنرجع لطبيعتنا تاني خصوصا لو كنا بطبعنا اجتماعيين و كده

بس انا بقي ايلي بيحصل معايا مش كده .. ايلي بيحصل معايا اني جيت في فترة اخدت اجازه من الناس كده و قفلت الفيس بوك و بعدين لما جيت ارجع بقي للتعامل تاني لقيتني مش عارفة اتعامل و شوية بشوية بدأت ابقي مش اجتماعية و مش قادرة يبقي في ناس كتير حواليا و مش مكتئبة يعني و لا زعلانه و لا اي حاجه بس مش حاسة اني عايزه ابقي حوالين ناس كتير و لا ناس كتير حواليا

المهم مؤخرا بقي بدأت فعلا بقي خلاص مش عايزة ناس بالكتير او اتنين او ثلاثة ناس .. و بدأ يظهر لي صديق تخيلي مش قادره استغني عنه .. انا مش حاسة اني عندي مشكلة .. بس الفكرة انه كل دي مؤشرات لمشكلة !!!

يعني مش عارفة هو طبيعي واحد اجتماعي جداااا يتحول للعكس جدااا من غير حاجة منطقية غير انه هو بقي مرتاح كده اكتر .. انا مش هستغني عن صديقي التخيلي حتي لو مبقاش عندي اصدقاء حقيقيين يعني

اتمني اني مكنش بمر بمشكلة .. بس التعامل مع الناس مرهق و متعب و مخيب للامال !!

أنـــــت تقدر

2011-12-26T01:33:00.004+02:00

هل أنت فعلا عارف أمكانيات نفسك ؟؟

الاجابة هتبقي ايون طبعا , بس فعليا لا محدش فينا عارف أمكانيات نفسه فعلا سواء انه مقدر انه يقدر يعمل حاجات هو فعليا ميقدرش يعملها او فاكر انه ميقدرش يعمل حاجة و هو يقدر يعملها و يعمل أحسن منها كمان

طب دي نفسك يا عم الحاج فما بالك بقي بحد تاني غيرك .. ازاي تقدر تحكم عليه انه يقدر يعمل حاجة او ميقدرش .. اكيد انت متقدرش تحكم صح .. ممكن تكون متقصدش انك تحبط ايلي قدامك بس انت كده بتكسر مقاديفه و ممكن بكلمه انت متقدرش دي حياه الشخص ايلي قدامك تمشي في مسار وحش اوي

يبقي بجد بالله عليكم محدش يقول لحد انت متقدرش .. قول له حاول و ربنا يكرمك

يمكن فعلا يقدر يعملها و يبقي بسببك حياة الشخص دي اتغيرت للاحسن !!

لو عكسنا الكراسي بقي .. اي حد يقولك متقدرش نفض لكلامه و قول لنفسك مش هخسر حاجة لو جربت و بردو مش هخسر حاجة لو جربت و فشلت هتعلم كتير في التجربة ..

و يمكن بردو ربنا يكرمني و أقدر

ايلي بيقولي متقدرش ده ميعرفش كل حاجة .. ربنـــــــــا موجود و قادر يقدرك و تعمل كل ايلي بتتمناه

أحـــــــــــــــــلم و حـــــب حياتك و عيشها و جرب فيها كتير كل ما هتجرب أكتر .. كل ما هتتعلم و هتطور نفسك و هتقدر تقرب و تعرف امكانياتك اكتر و تكتشف في نفسك حاجات كتير مكنتش تعرفها عنك

ثق في ربنا سبحانه و تعالي انه لو شاف جواك رغبة شديدة في حاجة فيها خير ليك هيقدر و يعينك عليها

يـــــــــــا رب يحقق أحلامنا كلنا و بجد أنت تقدر

لو عندك حلم او حتي لو مجرد عايز تعمل حاجة اي حاجة اوعي ما تسمعش الاغنيتين دول ;)

هنــــــــا
و
هنــــــا

انا جيت و انت لسه مجتش

2011-12-23T01:15:00.002+02:00

ساعات و انا واقفة في المطبخ بعمل اي حاجه بشوفك جنبي

واقف تحكيلي ايلي حصل في الشغل و تساعدني
.......
وانا مستعجلة و بروق اوضتي بشوفك بتقولي طب اعمل معاكي حاجة ؟؟؟
.....

بشوفني قاعدة بقرأ و بتقف قدامي حاجة بسألك عليها فتسيب ايلي في ايدك و تقعد تشرحلي
......
كل يوم الصبح و انا بشرب مشروبي الصباحي ببقي بفكر أعملك معايا كوباية و اقعد ادردش في خيالي معاك
......
بشوفني ساعات بتشعبط في ذراعك وقت البرد
......
بشوفنا كتير اوي بنصلي جماعة و القرأن بصوتك اعذب و احلي من كل القراءات حتي لو اتلخبطت او مكنتش متمكن اوي

......
بشوفني عكيت اكله جديده و طلعت اي كلام و انت بتجبر بخاطري
....

بشوفنا بنتفرج علي فيلم كارتون زي الاطفال وبناكل فشار
....
بشوفنا بنعيط في مشهد مؤثر في فيلم زي العبط
....
بشوف كفك منديل بمسح دموعي

....
بشوفك بتدعيلي اووي

ازاي بعد كل ده انت مش حقيقي .. !

شغف غير مبرر للطعمية

2011-12-20T15:01:00.000+02:00

كل يوم بصحي الصبح بفكر اني عايزه اكل طعمية !! بقالي علي هذا الوضع حوالي ثلاثة ايام و اكلت طعمية و لسه عندي بردو الشغف للطعمية دي !! مش عارفة مالي و مال الطعمية !!

I don't feel good

2011-12-19T14:38:00.001+02:00

حمد الله علي السلامة

2011-12-10T17:11:00.003+02:00

السلام عليكم و رحمه الله و بركاته

ازيك يا بنتي عاملة ايه وحشتيني و الله جداااااااااااا بقالي كتير اوووووي مكتبتش فيكي بس و الله دايما علي بالي و وحشاني كده بس اعمل ايه بقي منه لله تويتر هو ايلي شغلني عنك و عن الكلام معاكي

هاه مش قولتيلي رأيك ايه في النيو لوك ايلي عملتهولك ده ؟؟ انا متأكده انه عجبك و اهو تغيير بردو

المهم انا حبيت اطمنك عليا اني بخير الحمد لله و هبقي اجي احكيلك بقي ايه ايلي اتغير فيا من ساعة اخر مرة اتكلمت معاكي فيها .. يااااه دا انا عندي حكاوي كتييير هتعجبك ان شاء الله

اراكي لاحقا يا عزيزتي

حلم من بؤجه الاحلام ايلي في قلبي

2010-10-20T21:34:00.004+02:00

يمكن يبان الحلم عادي او عبيط

يمكن تشوفه سهل جدا او سخيف

ميهمنيش

يمكن يكون الحلم عندي ضوء النهار

شمعايه قايده في الظلام

مسالتنيش ايه هو حلمي!!!

مطعم صغير

علي رمل و ميه زرقاء

الوانه دافيه كما النيران

و بلحن عود اصيل خافت جميل

طب و ليه صغير مش كبير ؟؟

اركانه تضمني .. تاخد من دفا قلبي و تنشره علي كل قلب , علي كل اكله , علي كل شئ

افتح بيبانه كل يوم و بنفسي استقبل ضيوفي بالورود

و في كل جمعه يبقي حب تاني بلون بلاد بنحبها

يوم شامي ... صوت الصحون .. دبكه و جنون

يوم خليجي .. ريحته المكان .. كبسه و لحوم

يوم تاني و يوم ثالث و يوم رابع

ايام كلها فرحه و شجون

يهمني حلمي البرئ مهما يكوووووون

ميهمنيش ان كنت شايفه حلم عادي او عبيط

تاني و هقولك ميهمنيش ميهمنيش

ميهمنيش

مش مؤمنين خالص .. بس مؤمنين جدا

2010-04-23T20:32:00.004+02:00

أيه يا جدعان البنت صاحبتنا دي زعلانه ليه ؟؟
يا ستي اصله الولد ايلي متقدم عشان يخطبها مصر اصرار فظيع انه مامته و اخواته يشوفوا شعرها قبل ما يجي يخطبها
ممممممممممممم انا عارفه انه من حقه في هذه الرؤيه الشرعيه

بس هو لسه مقعدش معاها الا ثلاث ساعات ؟؟ يا تري هو شافها من جوه صح ؟؟
يا فاطمه ... هو تلاقيه مستني لما يتخطبوا بقي عشان يعرفها اكتر
يعني هي لو موافقتش علي الموضوع ده .. هو هيفركش الدنيا ؟؟!!!!!

فلاش باك علي موقف تاني
كنا في كتب كتاب و بعدين فيه زي خطبه حد كان بيقولها مكنتش عارفه مين ده و لا ايه عشان كنا قاعدين كبنات في قسم منفصل
لقيت الراجل بيقول حقوق الزوج و الزوجه في الاسلام و في النص كده لقيته بيقول
علي الرجل انه يختار المرأه الجميله لاننا اصبحنا في زمن الفتن !!!!!
يااااااااااااااااا لهووووووووووووووي علي الصدمه!!
رحت باصه لصحباتي و قولت لهم طب و البنات الوحشين يعملوا ايه؟ يولعوا في نفسهم يعني و لا ايه ؟؟؟

و فجاه نطت في دماغي صوره كل ايلي شافها قال ازاااي؟!! و تنح!!

ايه ده ما شاء الله عليه بجد؟؟
بس تفتكر هو اختارها علي اساس ايه ؟؟.... تفتكروا الجمال كان عامل ؟؟ تفتكروا لو الست دي احسن ست علي وجه الدنيا و احسن اخلاق و احسن دين؟؟
كان حد من شاببنا المسلمين ارتبط بيها ؟؟؟

قعدت افكر شويه كده و قلت اكيد الست دي فيها حاجه من جوا جميله اوي هي ايلي خلت الراجل ده يتزوجها و يختارها و يستمر زواجهم لمده تسع سنوات و ما زال مستمر ما شاء الله
و الصراحه مش عارفه اقول ايه اكتر من كده
مش مؤمنين خالص ..... بس مؤمنين جدا

!!!!

خمستاشر!!!!

2010-04-06T20:37:00.004+02:00

سؤال دائما ما يطرح نفسه!
ازاي انا كده و انا حاجه صغيره اووي هبقي مفيده للناس و بخدم المجتمع و بقوم بدور و لو صغير اوي في اني اخلي حياه الناس افضل!!!!!!
دايما نسمع الناس بتقول دور علي اكتر حاجه بتحبها و اعملها و ساعتها هتبقي رقم واحد فيها و هتقدر تبقي متميز

كنت في يوم بتكلم مع واحده صديقتي و بقول لها بجد بجد انا بحب اوي المطبخ و الطبخ و ادوات الطبخ و كل ده ... دي اكتر حاجه بعملها و بتخليني سعيده و حاسه اني طايره .. تفتكري ممكن ابقي في يوم من الايام الشيف فويطمه :D:D:D:D
و بعدين رجعت كملت كلامي قلت لها لا انا بحب الطبخ اه بس مش عايزاه تبقي مهنتي و كده كفايه انها حاجه بتخليني سعيده انا و اصدقائي و عيلتي..
ردت عليا صديقتي و قالت لي و تفتكري انتي ممكن تفيدي المسلمين و لا الاسلام بأيه لما تبقي الشيف فويطمه؟؟ تفتكري دا ممكن يصنع نهضه و لا يعيد حضاره ؟!!!
سكت كده كتييييييير و قعدت افكر ممكن افيد بأيه ؟؟ ممكن افيد بأيه ؟ ايه هيفرق في حياه الناس لما ابقي شيف!!!
و قلت لها ساعتها تصدقي عندك حق ...

و عدت ايام كتير مش فاكره عددها ايه و كعادتي بمارس هوايتي المفضله الا و هي مشاهده قنوات الطبخ و برامج الطبخ و خاصه الاجنبيه منها :D:D:D::D
في شيف اسمه جيمي اوليفر من اشهر الطباخين في لندن و العالم كله و بجد انا بحب اسلوبه و طريقته و خبرته و المعلومات ايلي بيديها طبعا في مجال الطبخ
لقيته عامل حاجه اسمها خمستاشر !!!!
ايه ده يا جدعان؟؟!
ده عباره عن مطعم جديد هو هيفتتحه قريب و هيكون موجود في مطبخه 15 طباخ و طباخه
طب و ايه يعني مالهم دول ؟!!!
بالتعاون مع جهات الخدمات الاجتماعيه اعلن جيمي اوليفر عن احتياجه ل 15 طباخ عشان يغير حياتهم
بحيث يكونوا حد عايز يتغير و ظروفه صعبه
و هيقوم جيمي بتعليمهم الطبخ الاحترافي من غير فلوس و لا اي حاجه غير الالتزام بالدروس ايلي هيديها
يعني من الاخر الخدمات الاجتماعيه عندها ناس كتير معندهمش فلوس او عاطلين او حتي ملهومش مأوي او بيعانوا من ظروف اسريه صعبه و قهريه
بعتوا للناس دول كلهم و مجموعه منهم اتقدمت و عملوا معاهم مقابلات و درسوا حالاتهم كويس عشان لما يتعاملوا معاهم في المطبخ يبقوا فاهمين
و بدأت الدروس و كل ده و جيمي اوليفر بيظبط معاه مجموعه من الشيفات عشان يدربوهم و هو بيظبط المطعم كديكور و كل حاجه ممكن تخطر علي بالكم و يبدأ الافتتتاح بتاع المحل بعد ما كل الناس دي بقت محترفه و اتعلمت حاجات كتير مس بس مهنيه لا كمان اخلاقيه و سلوكيه و اتغيرت حياتهم للابد!!!
راااااااااااااائع جداااا .... بس ايه ده ده الراجل ده شيف عظيم اوي ... بالرغم من انه شيف الا انه قدر يفيد مجتمعه بشكل كبير اوي
لو تخيلنا كل صاحب مهنه مقتدر !! تعاون مع الخدمات الاجتماعيه بالشكل ده
ممكن المجتمع كله يبقي شكله ايه في خلال بضعه سنوات ؟؟!!!!!
يعني الشيف يا صديقتي قدر يفيد المجتمع !! بس عشان هو كان عايز يعمل حاجه زي كده من الاول!!!
ايه ده !! ده مش بس الشيف ده ممكن اي حد في اي حته يفيد و يفيد اوي بس لو كانت وجههته في الحياه مساعده الناس !!
كده اقدر ابقي شيف و انا مطمنه :D:D:D:D:D:D

الفيلم ذو الأربع أبعاد

2010-03-04T00:02:00.009+02:00

فيلم أفاتار الفيلم ذو الاربع ابعاد و ليس فقط الثلاث أبعاد

لم أكن أرتدي نظاره مخصصة لروئية البعد الرابع كما فلعلنا لرؤية البعد الثالث

لقد كان بعدا غاية في الوضوح ... بعدا سياسيا

يحكي الفيلم قصة فريق فضائي يحاول استكشاف كوكب بعيد يسمى "بندورا"

تشابه صفاته صفات الارض , حيث يجد الفريق كائنات مشابهه للبشر يسمون نافي

يتميزون بطول القامة ولون بشرة ازرق , ويحاول الفريق التأقلم معهم وتكوين علاقة مشتركه ..

يقود الفريق " جايك سولي " وهو جندي سابق في البحرية الامريكية اصيب بالشلل

سابقا في احدى المعارك على الارض , وسيتمكن من المشي مرة اخرى ذهنيا في الكوكب الجديد ..
وبما ان الانسان لايستطيع التنفس على سطح كوكب لذلك يقوم علماء الارض بدمج بعض

الجينات والمورثات وتكوين اجسام جديدة تدعى "أفاتار " حيث تكون الاجسام متصلة

ويتم التحكم بها ذهنيا بواسطة جيك وباقي افراد الفريق !!و يمكنهم التنفس والتحرك في
كوكب باندورا بحريه

ويكتشف العلماء وجود ماده لا تقدر بثمن في أرض هذه الكوكب و يحاولون ان يتافهموا مع
أهل هذا الكوكب لكي يستولوا علي هذه الماده

فيرسلون الكثير من الافاتار و يبدأون في اعداد العده لكي يغزوا هذا الكوكب في حال رفض اهله الرحيل عن مكان هذا الكنز المدفون

وبدأت من هنا الاحداث تذكرني ب الغزو الامريكي علي العراق ... حيث قال البطل لاحد المسئولين عن اعداد الجيش للهجوم علي الكوكب

بأنهم لن يخرجوا من كوكبهم هذا فليس لدينا ما يرغبون فيه ... بل نحن من نرغب فيما لديهم ...

و بتعمق البطل في حياه هؤلاء النافي وجد أنهم يقدسون الطبيعة و يحترمون حتي ارواح

الحيوانات و يستمدون طاقتهم الروحانيه من شجره يدعونها الايوا هي التي توجهم و تبعث اليهم برسائل و انهم ياتفون حولها في شكل شبكه تكون الايوا هي مركز الشبكه

ذكرني هذا بمشهد اسلامي صميم ... مشهد الحرم المكي و الناس يلتفون جميعا حول الكعبه يصلون و يبتهلون و يدعون و كأنهم شبكة مركزها الكعبه الشريفة

في الفيلم كانت الايوااا هي المنقذ الذي انقذهم من العدوان.....

فهل ندرك نحن ان تمسكنا بديننا و التفافنا حوله كل منا يمسك بيد الاخر يدعمه و يقويه ...يصنعون جميعا موجه قويه في وجه من يحاول الاعتداء علي املاكنا ؟؟

في الفيلم قرر الفريق بدايه غزو كوكب بندورا و بالفعل احرقوا شجره يعيش فيها النافي

بدأ يدب الرعب في قلوب النافي و بدأت اعتقد انهم لن يواجهوا غزو البشر لهم .. لكن ما حدث انهم بدأوا يستعدوا و يرسلون في طلب العون من قبائل أخري مجاوره ... و بالفعل انتصر النافي و لكن بعد ان ارسلت اليهم الايواا أمداد علي هيئه قطعان من الوحوش و الكائنات

أثار هذا الفيلم الكثير من التساؤلات في عقلي و حاول ربط الكثير من الاشياء ببعضها

البعض ... فكره الغزو و بدايه تذكرني بما حدث في العراق .... أما ما فعله النافي لكي

ينتصروا من وضع الخطط و الطلب في الاستعانه بالقبائل المجاوره و طلب العون من الايواا

يجعلني اتوقف عند موقفنا نحن العرب من قبائلنا المجاوره كالعراق و فلسطين !!!!

الخناق لا يفسد للود قضية

2010-02-26T01:45:00.008+02:00

أن نختلف فهذا شئ طبيعي .. أن نخطئ في حق البعض و أن يخطئ البعض في حقنا ... هذا وارد الحدوث ...بل هو كثير الحدوث

لكن الاهم هو الاسباب و النتائج ؟؟؟!!!!
أحد الاسباب من الممكن أن يكون هناك اختلاف في مفهوم الحقوق و الواجبات عند الطرفين مما يؤدي الي سوء الفهم ........
أو ربما هناك بعض الجهل بجوانب شخصبه من تتعامل معه ... علي سبيل المثال أن يكون الشخص مفرط الحساسيه تجاه بعض الكلمات او الافعال ...

ليس من الضروري أن يحبذ الشخص نفس طريقه التعامل التي يتعامل بها هو عندما تبدأ في تطبيق طريقه تعامله معك في بعض المواقف او حتي كلها

فمن الخطأ أن نفترض ذلك بل من الخطأ تماما أن نفترض ذلك

ألاهم الان النتائج ؟
ماذا يحدث بعد الخلافات؟
هل تتأثر علاقتنا بالاشخاص ؟ هل تتغير طبيعه العلاقه ؟

لا يجب ان يحدث ذلك بل من الضروري أن يحدث بعض الاختلافات فهي توضح لنا و تبين لناا جوانب و تفتح لنا أفاقا اخري لفهم الاخر جيدا و التقرب منه أكثر و استعاب جوانب جديده في شخصياتنا و شخصيات من نتعامل معهم
كما يفتح لنا مجالا ان نطبق ما تعلمناه عن ثقافه الاختلاف و تقبل الاخر بكل اختلافاته و تطرفه عن مألوفاتنا و تقبل ما لا يعجبنا و ما يعجبنا بصدر رحب

اختلافنا و اختلافاتنا ليس من الضروره ان يؤثر علي مشاعر حبنا تجاه الاخرين بل من المفترض ان نستمد طاقات جديده للحب لانها ساعدتنا علي ادراك الكثير من الاشياء !

مهما بدا أن الاخر يعرف عنك و يستطيع فهمك و استيعابك بكل ما بك هذا لا يمنع انهم دائما يحتاجون اليك لكي تعرفهم علي نفسك و علي مشاعرك و احاسيسك و تأثير افعالهم عليك و علي حياتك فهذا يوسع دائره ادراكهم لك و تتوسع انت في ادراكهم

فلا تفترض أنهم يدركونك و يعون كل ما يتعلق بك بنسبه 100% لانك انت نفسك لا تدرك نفسك بهذه الدرجه
فلا تلومهم علي عدم فهمك بل لوم نفسك علي عدم توضيح نفسك لهم في هذه النقاط ... او الافضل الا تلوم نفسك و تبدأ علي الفور بالتوضيح و عرض بعض ما يحتاج اليه الاخرون ليفهموك أكثر بشكل واضح و كافي !!!

يا حبيبتي يا حبيبتي

2009-12-30T22:58:00.004+02:00

بلوجتي العزيزه اللذيذه جداااااااااااااا

تصدقي انك بقي عندك سنه كامله يا جميله انتي

اهو انتي كنتي من الحاجات الجميله اوي ايلي حصلتلي في 2009

و ايه تاني حصل في 2009 ممممممم

لقيت الكنز المدفون .... لقيتني انا اوي اوي

في رحله الحياه فقدتني بضعه سنوات ثم بفضل الله لقيتني من تاني ... حبيتني من تاني

يااااااااااااااااا ه الحمد لله بجد بجد بحبك يا ربنا اوي و بشكرك علي كل نعمك و علي وجودك جنبي

كفايه اني الاقي نفسي من تاني ده لوحده سبب يجعل 2009 من اجمل سنوات عمري

و خصوصا اني لما رجعت لقيتني لقتني بقيت اكثر خبره و عقل و نعم كتييييير اوي من ربنا عليااااا

و اتعلمت بجد دروس من الحياه و بدأت انفذ ايلي اتعلمته و ده شئ عظيم بجد

و ايه تاني يا طماطم

ممممممممممم انا شايفه انها كانت سنه علي الصعيد الشخصي ناجحه جداااااااااا

بينما لم تكن كذلك علي الصعيد العملي و الدراسي !!!!!!!!!

فقدت الكثير و لكنه كان فقدان مفيد كنزيف الانف تفقد فيه بعض الدم و لكنه كان دم فاسد

عوضني الله خيرااا كما فقدت و الحمد لله

و الواحد بصيرته ضعيفه مش بيبقي قادر يشوف ابعد من حد معين لكن ربنا سبحانه و تعالي بيبقي عارف مصلحتنا بس احنا ايلي مش بنبقي قادرين نشوف

الحمد لله الحمد لله الحمد لله الحمد لله

"My Wish"

2009-12-25T21:55:00.003+02:00

"My Wish"

I hope that the days come easy and the moments pass slow,

And each road leads you where you want to go,

And if you're faced with a choice, and you have to choose,

I hope you choose the one that means the most to you.

And if one door opens to another door closed,

I hope you keep on walkin' till you find the window,

If it's cold outside, show the world the warmth of your smile,

But more than anything, more than anything,

My wish, for you, is that this life becomes all that you want it to,

Your dreams stay big, and your worries stay small,

You never need to carry more than you can hold,

And while you're out there getting where you're getting to,

I hope you know somebody loves you, and wants the same things too,

Yeah, this, is my wish.

I hope you never look back, but ya never forget,

All the ones who love you, in the place you left,

I hope you always forgive, and you never regret,

And you help somebody every chance you get,

Oh, you find God's grace, in every mistake,

And you always give more than you take.

But more than anything, yeah, and more than anything,

My wish, for you, is that this life becomes all that you want it to,

Your dreams stay big, and your worries stay small,

You never need to carry more than you can hold,

And while you're out there getting where you're getting to,

I hope you know somebody loves you, and wants the same things too,

Yeah, this, is my wish.

My wish, for you, is that this life becomes all that you want it to,

Your dreams stay big, and your worries stay small,

You never need to carry more than you can hold,

And while you're out there getting where you're getting to,

I hope you know somebody loves you, and wants the same things too,

I hope you know somebody loves Yeah, this, is my wish.

This is my wish to you

May all your dreams stay big

http://www.youtube.com/watch?v=6eCYb0X9iqM&feature=related

فضفضه كلاكيت ثالث مره

2009-12-13T03:29:00.005+02:00

مش عارفه ابدأ الكلام ازاي و لا انهيه ازاي

هو بيجي كده و بيخلص كده من غير ما اخطط ليه

من كام يوم كده كنت نازله الكليه و مطبقه عشان لو نمت مش هعرف اصحي بدري

و ضاربه نفسي بكل حاجه عشان انزل عشان اليوم ده يوم السكاشن و مهم اوي و مش هيتعوض

طول الليل عماله ادعي اني اشوف البناتيت زميلاتي في جروب المشروع و نحضر مع بعض عشان اليوم دمه يخف شويه بدل ما هو دمه تقيل كده خصوصا ان البناتيت دول دمهم زي العسل و انا بمووت فيهم

و سبحان الله فعلا الاقي الناس موجوده و بتحضر معايا بالرغم من انه ده مش يومهم

ام هند بقي انا طبعا في اول سكشن ده كنت مبسوطه موووت و انا قاعده في وسطهم كده

و طبعا طبعا عادتي الشهيره اني بكتب للناس في كشاكيلهم كلام كده فوق في وسط المحاضرات و السكاشن زي " يوم سعيد "

استمتعي بيومك و كلام لطيف زي كده و بجد بجد انا مش بكتب الكلام ده لاي حد انا بكتبه بس للناس ايلي بحس تجاهم بمشاعر طيبه

فكتبت لبنوته منهم و هي كتبتلي كمان انا بحبك

قلتلها و انا كمان ...فردت عليا و قالتلي بس انا مش حساها

ساعتها حسيت اني توهت جوا نفسي كده و مبقتش موجوده في المكان و مبقتش شايفه البنت

كل ايلي شفته كان نفق بيبص جوايا و لاقي قلبي كمشان جوا نفسه و كان خايف بيقول الكلمه و هو خايف

و بعدين قلتلها لا و الله بجد انا كمان بحبك

و كنت عارفه انها لو مش صدقتني هيبقي ليها حق عشان كل خليه في جسمي كانت خايفه و متردده و هي بتقول الكلمه دي

ايه يا فاطمه ايلي حصلك ده ؟؟

مش عشان تجربه صحوبيه فكسانه هنخاف و نكش من الناس يا بنتي !

كنت عايزه اقول للبنت معلش اعذريني لو محستيش بكلامي اوي او مطلعش مني زي ما انتي عايزاه بس انا لسه مش قادره احس بالامان مع الناس

مش قادره ادي الحب من غير ما اخاف انه مقابله هيكون جرح

بس كل ايلي حصل ساعتها اني بصيت للبنت و سكت و منطقتش

عايزه اعتذر لكل بناتيتي الحلوين ايلي بيحبوني اوي و انا حاسه بحبهم الفظييييع ايلي بيخليني عايزه اعيط من كتر التأثر

حبكم ايلي بينور حياتي و بيخلي للحظات كتير طعم و معني مختلف .. حبكم ايلي بيسندني و يخليني اخد خطوه لقدام في حياتي

انا اسفه جداااااااااا بس انا بجد بحبكم

انا عارفه انكم عايزين تشوفوها في عنيا قويه و انا بقولها

بس مش قادره اعمل كده دلوقتي علي الاقل

ربنا يخليكم ليا و مش يحرمني منكم ابدااا

حفله تنكريه :D

2009-11-23T01:06:00.003+02:00

عايزه اعمل حفله تنكريه :D

او جلبيه بارتي :D:D

بس كده

فضفضه قلبت بمناجاه

2009-11-20T00:57:00.004+02:00

انا بعمل زي ما زوزو قالتلي

لما الدنيا تتلخبط في دماغي و تبقي كتير و مش عارفه رايحه فين و جايه منين فبكتب بقي

طب ابدا منين

مممممممممممممممممممممممممممممممم

مش عارفه

انا بدايق اوي لما الاقي الدنيا ماشيه في دايره كده مش عارفه هتخلص امتي او لما ادخل في دايره دخلتها قبل كده و خرجت منها بمصيبه :D:D:D

أكره لحظات الشك و الحيره و البحث هذه اللحظات تؤرقني و تفقدني اتزاني و تجعل مني وحشا لا يتردد في ان يلقي بكل ما داخله علي رأس احدهم ليس له اي ذنب في ذلك غير انه كان اول شخص يقترب مني في هذه اللحظات

احاول ان اسيطر علي ما يدور في عقلي و ان اظل لطيفه مبتسمه فليس للناس اي ذنب في ان يتحملوا جراء ما يحدث في عقلي

و علي الانسان المسلم ان يتصرف بحسن خلق هكذا افكر و هكذا يجب ان افعل

يجب ان اترجم افكاري هذه الي افعال حتي يتسني لي القول انني مؤمنه كل الايمان بهذه الافكار

فما الفائده من افكار اؤمن بها و لا اطبقها فقد تساويت اذا بمن كفر بهذه الافكار

عندما انتهي رمضان هذا الشهر المبارك فقد افتقدته كثيراااااا و احسست بفراغ داخل قلبي

و حزنت انه لن يأتي الا بعد عام كامل

و كنت قد نسيت هذه الايام المباركه العشر الاوائل من ذي الحجه

كم فرحت عندما تذكرت هذه الايام

اشعر بروحانيه فيهم جميله جداااااااا

لا ادري ان كنت اجتهد فيهم حق الاجتهاد و لكني وددت لو لم يكن هناك هذه الامتحانات حتي اتفرغ تماما لهذا الشعور الجميل

يا الله يا ربي يا الهي اللهم انك عالم ما تخفيه الصدور اللهم اعطني مسألتي يااا رب

من لي ألجأ اليه فيعينني و ينجدني و يساعدني

غيرك يا اله العالمييييين

يا الهي اخشي الموت , لا اخشاه حبا في الدنيا , و لكني اخشي ان القاك فتسألني ماذا فعلت في حياتي فانظر الي حياتي فلا اجد ما يشفع لي

اخشي ان اترك الدنيا دون ان اترك علم ينتفع به او ان تكون حياتي في قضاء حوائج الناس

اللهم توفني و انت راض عني

اللهم توفني و قد عمرت ارضك كما ترضي

اللهم اصلح حالي في الدنيا و الاخره

و ارزقني بمن يعينني علي مصاعب الدنيا

ياااااااااااااااااااااااااااااااااااااا رب من لي سوااااك

يوم سيميناري جداااا

2009-11-16T04:38:00.007+02:00

ترمس بالشطه هههههههه

انهارده كان يوم خرافي بكل المقاييس حبيت اليوم بكل ما فيه حتي بلحظات الضعف حتي ببعض كلماتي التي لا تخلو من الهبل احيانا في بعض المواقف

انهارده حضرت اول سيمينار في حياتي و كان في سيمينار بجد خرااااااااااافي عجبتني قد ايه فكرته كانت جديده و مليانه تحدي لكل الحاجات الصعبه بل كل الاشياء التي قد تبدو لي و لكم مستحيله و لكنها بالطبع لا تبدو كذلك لصاحب المشروع و ده عاجبنيييييييييييييي بجد حسيت انه مجال السيمينار ده مجال ممكن اكمل شغل فيه لما يحين وقت مشروع تخرجي

بجد انبسطت بالسيمينار جداااااااااا الحمد لله

مممممممممممممممم و اي تاني حصل انهارده ؟؟؟

و احنا مروحين بقي انا و موكا و سمر عزمتنا موكا علي ترمس بالشطه و الكيس كبييير ب 2 جنيه كده للفرد فضلت اكل في الترمس ده لحد ما دخلت باب شقتناااااا

يا لهوي بجد ضحكنا ضحك انهارده و خصوصا و احنا بنتكلم علي الكيرنال و الاو اس و اكتشفنا نفسنا في الاخر واقفين جنب باسكت للقمامه كبيييير و بنرمي فيه قشر الترمس :D:D:D:D:D::D:D:D:D:

,و لا ايه و احنا بنتكلم علي لاب توبي الكمييييييل صلاح الخير :D

ههههههههههههه

فاجأت موكا بجمله سريعه متأثره : شوفتي يا موكااا مش صلاح الخير عياان

بصتلي كده و كأني اتكلمت عن حد بجد و تنحت شويه و بعدين ادركت اني بتكلم عن اللاب توب

هههههههههه كانت هتاكلني اساسا و بعدين قعدت تقولي يعني ايه صلاح الخير ازاي يعني صلاح الخير هو الخير محتاج صلاح ده الخير هو الصلاح :D:D:D:

قلتلها هدي اعصابك شويه ده اسم شخصيه في مسلسل اذاعي عجبتني فاطلقت اسمها علي اللاب العزيز

المهم بتقولي ايه طيب ايلي حصل لللاب ؟؟

قلتلها الديل كان تعبان شويه و وديناه يتعالج :D:D:D:D::D:D

قصدي الشاحن بتاعه يعني :D:D::D:D:D:D:D:

ممممممممممممممممممممممممممممممممممممممممممممممم

المهم بقي سيبنا من الكلام الفاضي ده

اليوم ده انا طلعت منه بشويه حاجات لازم ادونها :D

اول حاجه : لما حد يسألني سؤال و انا في الماجستير او اي حاجه تانيه ارد عليه زي ما دكتور بسنت كانت بتعمل

"ده سؤال رائع فعلا ,شكرا جدا ليك "

وبعدين تبدأ تجاوب و بالطريقه دي هي ادت عقلها وقت كافي انها تجاوب علي السؤال و في نفس الوقت مهدت مساحه من الارتياح ما بينها و بين السائل :D

و حاجات كتير مش فاكرها استنتجناها مع بعض و احنا ماشيين بندردش

تاني حاجه : العلم ثم العلم ثم العلم ثم العلم ثم العلم و احنا لازم نستغل كل فرصه للتعلم و ناخدها عشان بجد الوقت بيجري بسرعه و مفيش وقت كفايه قدامنا عشان نلحق ندي ايلي المفروض نديه

الجمله الاخيره دي تبدو غريبه خرافيه كده بس مش مهم انا فاهماها :D

بس بجد بجد بجد أحلي حاجه في اليوم بجد اني عملت كل حاجه في اليوم ده بجد كانت عشان ربنا عشان عايزه قلبي يرجع ابيض و جميل زي يوم ما اتولدت ... بس مش هقول عن الموضوع ده اكتر من كده :D:D:D:DP

و انهارده كان اوكازيون :D:D:D::D:D

بس كان ناقص اليوم حاجه بجد مهمه جدااااااااااا هو اني معملتش و لا حاجه تقريبا من ايلي كنت مخططه اعمله و ده شئ سئ جداااااااااااااا بس انا بحاول اعالج الموقف

و بفكر بكره اشرب عصير بوريو و محدش يقولي ايه ايلي جاب ده لده :D:D:D::D

سلام يا بلوجتي الكميله

عراب في حياتي

2009-10-31T20:10:00.004+02:00

عراب في حياتي

عراب التفكير الاول : أبي العزيز
عراب الحب الاول و الاخير : أمي الكريمه
عراب المبادئ : محمد صبحي
عراب التفكير التحليلي و النقدي: زوزو
عراب التفكير الابداعي : "السيد مجاهد "خالي العزيز
عراب الصداقه الوفيه :هاله شقيقه القلب ,لمي شمعه الامل , الشيماء
عراب حب الحياه : داليا اختي
عراب العلم : الدكتور مصطفي محمود (رحمه الله) و الدكتور احمد زويل و الدكتور مصطفي مشرفه و سميره موسي

و سيأتي الكثير من العرابين في حياتي و لكن لن يرحل احد مهما طال الزمان و مهما رحل منهم فسيظلوا شمعات اضأت لي الطريق
و ستضيئه و تضئ دروب الكثير

و لعلي نسيت بعض العرابين اعتذر لكم جدا فتخونني ذاكرتي كثيرا هذه الاحيان

2009-09-23T14:04:00.004+02:00

انا :هو انتي ازاي بتعرفي تعملي كدا يا ماما ؟

ماما : يا بنتي انا خلاص مبقتش اعرف اعمل غير كده
انا : يا ماما بس طنط دي بتعاملك وحش اوي و انتي بنفسك كل يوم بتشتكي منها و من ايلي بتعمله و بتبقي زعلانه
و بالرغم انك انا و انتي فاهمين انها ملهاش حق تعمل كده و لا تطلب ده و لا حتي تزعل منك
طب ليه بقي انتي عايزه توديلها الحاجات الحلوه دي و تراضيها و مش تسيبيها في حاجه مضيقاها ؟؟
ماما :اصله انا بجد مبحبش اشوف حد مضايق و لا زعلان حتي لو ملوش حق
انا : يا ماما بس انتي كده هتخليها تزيد في غلطها و تفتكر نفسها صح
ماما : يا بنتي اصلها خلاص يعني اكيد مش هتتغير بعد ما بقي عندها 60 سنه يعني
انا : ماما انا بجد بحبك اوي و مش عارفه انتي ازاي بجد بتقدري تكوني طيبه كده انا كنت كده زيك بجد و كنت كل ما حد يضايقني افتكر انه الواحد حتي المفروض يقابل السيئه بالحسنه بس يا ماما محدش بيفهم ده خاالص يعني لو انا مثلا يعني عملت كده فعلا الناس مش بتفسرها كده بتفهمها حاااجه تانيه خااالص بتفهمها مثلا انك ملكيش شخصيه او انك حد متسامح علي طول يعني عادي حتي لو زعلناه هو بردو هيسامح
و ده بجد ايلي بيضايقني اوي اوي اوي
ماما: يمكن يا بنتي ايلي انتي بقيتيه ده هو ايلي مناسب للزمن دهبس انا بردو بعرف اتعامل مع الناس و ادي ايلي يستحق اكتر ما يتوقع و ادي ايلي ما يستحقش حبه علي قده برده
انا : لا بجد يا ماما انا بحاول مبقاش شريره و اتغير عما كنت عليه قبل كده ادعيلي يا ماما انتي عارفه يا ماما انا و الله كتير بقول عشان ربنا بس مش مهم الناس هتفتكر ايه
بس بردو مش بكون مرتاحه في الوضع ده بيبقي نفسي الناس تفهم صح يا ماما
ماما : ربنا يرشدك ل ايلي فيه الخير يا بنتي
انا : ايون ادعيلي كده كتير يا ماما

ماما دي بجد اطيب حد في الدنيااا بجد اوي . و اكتر حد في الدنيا عنده حب و اكتر حد ممكن يدي حب دي حتي بتحب الزرع بتاعنا و بتسقيه حب قبل ما تسقيه ميه .. دي حتي بتحب اللعب بتاعتنا و الدباديب و متشوفهاش و هي بترتبهم و بتلعب معاهم
ربنا يخليكي لياااا يا رب و يديكي الصحه يااااا رب

ساعات كتير بتمني انك متكونيش عودتينا علي الحب الكتير اوي ده ..

عشان بجد ده كله مش موجود الا في حضنك لما بدأت اخرج للدنيا بره و ابعد شويه عن حضنك

لقيتني في لاول كنت في الاول مشحونه منك كتيير اوي و ماشيه في كل حته اوزع
دفااا حبك و بعدين شحني بدأ يخلص و انا لسه بعيده شويه

و بحكم الحياه للاسف الشديد هفضل بعيده الشويه دول علي طول و يمكن ابعد اكتر
لسه بردو مازلت اشعر بالبرد

بردااااااااااانه

ورقه سعاده صغنونه

2009-09-19T14:51:00.004+02:00

في يوم مش فاكره امتي من زمان شويه صحيت الصبح بدري معرفش كنت بدعبس علي النت و البلوجز بتاعت الناس

رحت داخله بلوج جميله كده عجبني اوي الموسيقي و اختيار الصور فيهاااا قررت كعادتي لما تعجبني حاجه لازم اقول انها حلوه فقلت ابعت اسأل صاحبه البلوج عن الاغاني ايلي هي حاطاها و اقولها انه بجد دخولي المدونه بتاعتها الصبح كده غير مجري اليوم بتاعي و خلاني حاسه بالتفاؤل و الالهام لبدايه يوم جديد

عدت فتره كده علي ما ردت عليا صاحبه المدونه في ايميل و كده و خلاص

حدث زي ده بيحصل كتير في حياتي و بيتكرر بشكل او باخر علي مدار الايام و الشهور

زي اني اكتب علي ورقه "ابتسمي يا قمر" و اديها لبنوته مكشره اوي في المترو تقوم تضحك اقوم انا انبسط اوي و اقول الحمد لله اني ضحكتها مره و يمكن كل ما تفتكر الموقف ده تضحك

بس ايلي مكنش عادي في موقف البلوج ده و خلاني اكتب ليه بوست مخصوص لاني بجد مبسوطه مجداا بيه انه الاقي صاحبه المدونه ايلي دخلتها دي كتبالي كومنت علي البلوج بتاعتي و بتقولي اشوف البلج بتاعتها

رحت دخلت و بجد كانت المفاجأه الكبيره و الجميله اوي انها كتبت الميل بتاعي علي جنب كده و كتبت فوق ايميل خلاني سعيده

يااااااااااااااااااااااااااااااااه بجد انا مكنتش مصدقه انه ده بجد انه لسه الايميل ده بيمثل لها مصدر سعاده و انها تحطه كمان في البلوج

ده شئ كبير اوي عندي و يعني لي الكثيييير بجد

و لما دخلت تاني لقيت نفسي بحس بنفس الشعور الجميل مع قائمه الاغاني بتاعتها الجميله دي بجد

شكراااااااااا بجد يا حسناء اسعدتيني جدااا و خليتي اليوم بقي ليه شكل تاني

و دي المدونه ايلي بتسعدني http://think-abt.blogspot.com/

يوم جميل جدااا

2009-08-13T21:29:00.006+03:00

يااااااه قليل جدااااااااااا لما بكتب و انا مبسوطه و فرحانه بس كان لازم اكتب عشان اسجل اللحظه دي عشان انا بجد و الحمد و الشكر لله فرحانه فوق ما اي حد في الدنيا يتخيل بجد اللهم لك الحمد و الشكر كما ينبغي لجلال وجهك و عظيم سلطانك انهارده كانت مسابقه الايه سي ام للصيف و انهارده اول مره اشارك في المسابقه دي من ساعه ما دخلت الكليه و بالرغم من اني بقالي قرن مش بكتب كود سي بلس بلس و لا حليت قبل كده مسائل و لا ذاكرت كويس و قريت كتب قبل المسابقه لكن حليت مع التيم بتاعي مسأله و اتقبلت و مسألتين فيهم حاجه غلط و فكرت انا في فكره مسألتين بس مش كتبنا فيهم كود بس لقيت ان ايلي كنت بفكر فيه مظبوط و صح و ده انجااااز عظيم بالنسبه ليه حسسني قد ايه دماغي دي و الله كويسه و يجي منها بشويه تدريب و تخطيط و تنظيم بس
و لاني اتعلمت من صديقه لي ان اعطي الانجازات حقها ,صغيره كانت او كبيره
فعشان كدااا بكتب و مبسوطه عشان ااديها حقهاا هههه و ربنا يعيني ان شاء الله و اعمل كده انا كمان غير كل ده استمتع بالمسابقه و الجو و التجربه حتي لو مكناش حلينا و لا مسأله بردو كنت هبقي مبسوطه الحمد لله احلي حاجه كان شعارنا انهارده احنا داخلين نستمتع في المقام الاول قبل كل شئ بسسسس مش عارفه ممكن اكتب ايه تاني بس بجد سعيده و الحمد و الشكر و الفضل لله سبحانه و تعالي

pay it forward

2009-08-06T22:52:00.006+03:00

طبعا طبعا مساعده الناس ده مبدأ في حياتي انا الشخصيه الحمد لله ده غير انه في الاساس حاجه بيحثنا عليها الاسلام
بس مساعده الناس دي مش فلوس و لا كلمه طيبه و بس
لا دي فكره لما بفكر فيها بعمق شويه كده بلاقي انه مساعده الناس دي ممكن نسميها حاجات كتير نسميها دور في المجتمع و نسميها احساس بأخواننا في الدين و في الانسانيه و نسميها أثره و حاجات كتير جداااااااا

من يجي ثلاث سنين كده كنت بتفرج علي فيلم اسمه pay it forward

و الفيلم ده فكرته قائمه علي انه طفل صغير بيعمل حاجه كده انه بيبدأ زي حمله و هي بتنص علي انك تساعد ثلاثه اشخاص و تأثر في حياتهم بشكل ايجابي كبير من غير اي مقابل علي شرط وحيد انهم يعملو نفس ايلي انت عملته مع ثلاثه من الناس و هكذااا

عجبتني الفكره جدااا و فضلت ادور اعمل ايه في حياه مين و ازاي ؟ و مش عارفه و مش لاقيه الحاجه ايلي انا متخيلاها

لحد ما في يوم كده خبطت علي بابنا بنت البواب عندها واجب حساب و واجب لغه عربيه عايزه حد يساعدها
و بابا و ماما مكنوش موجودين لانهم في العاده هم ايلي بيقوموا بالموضوع ده لاني بكون يا اما نايمه يا لسه راجعه من الكليه يا اي حاجه

كنت باكل قلت لها معلش انا باكل دلوقت تعالي بس كمان نص ساعه و سيبيلي ايلي انتي عايزه اكون فهمت ايه الموضوع نظرا اني نسيت الحاجات دي نشرحها ازاي للاطفال
المهم طلعت قعدنا بتاع ساعتين بنشرح ازاي نحول كل القيم لنفس التمييز و نرتبهم و في الاخر عملتلها جدول تحويل من مللي ل لتر و الكلام القديم ده
و جيت كمان كام يوم كان عندها امتحان عديت عليها اشوفها عملت ايه
و لاول مره ادخل حجرتهم المتواضعه
و نطت ساعتها في دماغي الفكره بتاعت الفيلم
قلت الطبقه دي اكتر طبقه ايلي فيهم نفسه في العلم نفسه فيه بجد عشان هو سبيل الحصول علي المكانه الاجتماعيه و عشان حاجات كتير اوي

قلت طيب ليه ما اخدش البنوته دي ابث فيها كل حاجه من حب قرايه و قيم و مهارات كومبيوتر و كل حاجه اقدر اعملها
و فعلا اتفقت معاها اني همتحنها في كام موضوع هي تختارهم من كتب الدراسه بتوعها و لو نجحت و ذاكرت تمام هعلمها ازاي تشتغل علي الكمبيوتر ..... و الاختبار ده كان عشان اعرف ايه مدي حماسها للموضوع
و فعلا نجحت البنت و تمام و بدأت معاها اول معرفه للكومبيوتر
و ياا رب يقدرني علي الخطوه دي يااا رب

فضفضه علي الماشي

2009-05-23T07:50:00.006+03:00

لاول مره في حياتي اعرف و احس و افهم يعني ايه حاجه اتكسرت جوانا و عمرها ما هترجع تاني زي الاول مهما حصل
............
بس واحده صحبتي اوي اوي قالتلي حاجه كنت بقول زيها للناس
قالتلي فاكره لما كنا اطفال و بنتعور و نتخرشم و دم بقي و حركات بس دلوقتي كل الجروح دي خفت و ألتئمت و كله تمام صح!
قعدت اضحك ساعتها و اقولها ياااااا تخيلي بقي لو مكنتش خفت كان زمنا دلوقتي حاجه شكلها مرعب بكل المقاييس
...........

بس يا تري جروح و الألم الروح بتمشي عليها قوانين و مقاييس جروح الجسد؟

................
مممممم الصراحه مش عارفه
بس انا من خلال معرفتي بنفسي خلال الفتره الكبيره ايلي عشت فيها معايا
اني بني أدمه عاطفيه جداااااا و دي حاجه ساعات بتبقي حلوه و ساعات بتبقي وحشه اوي
بس ده بيخليني اتأثر بحاجات بسيطه اوي سواء بالسلب او الايجاب
يعني ممكن نظره في عين حد اشوفها تخليني احط الحد دا عندي في مقام عالي اوي و مقرب
او موقف بسيط في ثقه و حب يأثر فيا اوي اوي فوق ما حد يتخيل
و ممكن نظره تانيه تدايقني قوي قوي و تخليني في حاله نفسيه وحشه زي ما اشوف مثلا لو شوفت حد بيبصلي بنظره غيره شديده مني مع انه المفروض اننا اصحاب ازعل قوي من موقف زي ده

كوني شخصيه عاطفيه بيخليني عندي مشاعر كتير قوي طول الوقت و بما اني شخصيه معبره بحتاج اعبر عن مشاعري دي طول الوقت بأي شكل بقي ....... بس مش كل الناس بتتفهم الحته دي فيا
حتي كلامي كله في البلوج عن احساسي و مشاعري و بحب و بكره و كدا يعني
ده مش معناه اني مش عندي افكار و لا نظرات تأمليه فلسفيه في الحيااه
ههههههه حلوه نظرات تأمليه بتنجانيه دي
انا بس ببقي محتاجه اعبر اكتر عن مشاعري اكتر من احتياجي اني اعبر عن افكاري بصفه عامه
بس عشان البلوج متزعلش ولا تزهق و لا حاجه ممكن ابقي اعرض وجهه نظري في بعض الامور و ايلي هتعملي وجع دماغ كالعاده مع البشر

::::::::::::::::::::::
هكتب لست هنا كده عشان منساش

1- ايه رأيك في الراجل المصري الشرقي كزوج؟
2- هنربي اولادنا ازاي؟ و هل احنا قد المسئوليه دي ؟ او هنبقي قدها فعلا لما يجي وقتها؟
3-ازاي نصنع حضاره ؟!ده بقي تحقيق صحفي في الاجازه ان شاء الله و بعدها هبقي اكون وجهه نظري الشخصيه

مش فاكره دلوقتي بقيت الحاجات انا افتكرت الكام حاجه دول عشان كنت بتكلم فيهم مع واحده صاحبتي من فتره و لسه الافكار طازه في ذهني

يااااااااااااااااا افتكرت حاجه مهمه اوي اوي اوي اني محتاجه اليومين دول اواجه مخاوفي عشان اتغلب عليها و استعيد حياتي منها

دي شويه فضفضه علي الماشي ملخبطه و مش متظبطه بس في الاخر هي لحظات مني انا و لذلك احبها و افخر بها علي اي حال

بنتي و أمي!

2009-05-22T02:35:00.007+03:00

اسفه اوي اسفه جدا اسفه خالص مالص اخر حاجه و اول حاجه
انا عارفه اني بقالي فتره مهمله في حقك و مش بزورك و لا حتي بقولك اي حاجه
بس انتي عارفه مشاغل الدنيا و الدراسه و االافكار ايلي بتوجع الدماغ دي ساعات كتير بتخليني انساكي
للاسف بنساكي بالرغم من انك علي طول فاتحه لي ذراعاكي مستنياني بس اقول شكوي او انزل دمعه في حضنك
او حتي اقولك فكره حساها غبيه او حتي ابقي مجنونه او حتي خايفه او مذعوره او اكون رغايه او حتي اسكت
و افضل بصالك كتير اتأمل ملامحك و تفاصيلك و اتعجب ازاي قدرتي تطلعي كل ده مني و ازاي قدرتي تبقي انا
صحيح بجيلك بس لما الدنيا تقفل في وشي و مش الاقي حد غيرك يسمعني
او اجيلك عشان ببقي عارفه انه مفيش حد غيرك هيقدر يفهمني و يفهم خبايا الكلام و خبايا الافكار
و من غير ما اقولك بتحتفظي بكل حاجه بقولها

ساعات ببقي عايزه ابقي نفسي او حتي ابقي حد تاني
معاكي بكون اي حاجه عايزاها
ساعات احب افتكر حاجات حصلت زمان و اجيلك بقي نقعد نفتكر حاجات حصلت و نضحك و نبكي
ساعات محبش غير اني ابص بصه للمستقبل
,تروحي تديني صفحه مستقبل بيضاء ناصعه اصنع بها ما شئت
و تحسيسيني انه الدنيا هي الصفحه دي و بس
اشخبط ارسم اكتب الون و في الاخر ابقي مبسوطه زي الاطفال بالظبط
هو صحيح ميبانش للناس انك عندك كل ده عني و ميبانش بردو انك شايله كل ده
بس احلي حاجه بجد انتي, حاجه حلوه في حياتي و بحبك بجد
بحبـــــــــــــــــــــــك يا بلوجتي العزيزه اللذيذه

سامحكي الله يا أمي

2009-05-07T04:37:00.005+03:00

سامحكي الله يا أمي علمتيني كيف الإيثار ,
علمتيني كيف احب الخلق و ان اقبل كل الاعذار,
ان اتخذ الناس جميعا اقارب و كأن تربطنا الاوصال,
و لكنك يا امي نسيتي , ان هناك من هم اشرار ,
و هناك ايضا أخيارا ليسوا بأخيار
عذارا يا أمي و لكني وجدت تباينا ما بين اقوال و افعال!
و فقدت العقل بين القيل و القال
و وودت لو انك يوما علمتينا معني الاثره و ربيتي فينا القسوه و القدره علي الغدر و الخيانه و الاهمال!
اشكرك يا أمي لانك بالرغم من كل هذا اعطيتني سر الوجود و سر طاقات البشر
الا و هو الحب و لكن كان علي ان اتعلم كيف استخدم هذا السيف المسحور !

2009-04-23T23:08:00.003+02:00

شقيقه القلب أحبـــــــــــــــــــــــك فـــــــــي اللـــــــــــــــــــــــــــــــــــه

بحبها 2

2009-03-16T01:28:00.003+02:00

و راجعت من تاني

لسه بحب حاجات كتييييييييييييييييييييير

بحب يوميات ونيس و اكتشفت اني حفظاها و لسه بتضحكني من قلبي اوي لحد دلوقتي

بحب لمه العيله و الاصحاب و ضحكه طالعه من القلب اوي اوي اوي

بحب البرااااااااااااااااااااااءه بحبها بجد بحب اشوفها في عيون الناس

اكتشفت اني بجد مدمنه لصوت فيروز و شيرين و اصاله لدرجه اني بجد لو قعدت كام يوم مشغوله و مش سمعتهم ببقي هتجنن من الصوت ايلي مالي دماغي و ايلي لازم اتصرف و اسمعهم

بحب السجووووووود في الصلاه و ايلي بجد لما مش كنت بقدر اسجد كنت بعيط عشان مش قادره استمتع بالصلاه مش قادره احس بالصله بتسري في جسدي

بحب بحب بحب ااااه بحب اشتغل مع ناس مش لوحدي و بحس بالحياه و الانتعاش و انا جوه تيم لدرجه انه فاطمه المجنونه تطلع و تبوظ حته من البرستيج ههههههه قال يعني هو لسه مش باظ

بحب العلماء المسلمين القدامي زي ابن رشد و ابن سينا و الخوارزمي و غيرهم كتيييييير حياتهم كانت طبق سلطه مفيد لكل ما يتناوله بالدراسه و لكل من يبحث عن طريق

اااه صح بحب السلطه و الخضار و الفواكه جدااااااااااااااااااااااااااا

و بحب اشرب الحليب اوي اصلا مدمنه هههههه غريبه شويه بس اصلا زعلانه بقالي فتره مش بشربه معرفش ليه!!!

بحب الشمس لما يلمسني شعاعها !!!

بحب الالوان مووووت و اي حاجه ملونه كده بتبهجني

كفايه كده انهارده نكمل وقت تاني

حاجات بحبها (1) و

2009-03-14T05:16:00.004+02:00

مش عارفه بكتب ليه بس اكيد بكتب عشان اولا عايزه اكتب ثانيا محتاجه اني اكتب

قعدت افكر بحب ايه اكتر حاجه مممممم

لقيتني بحب حاجات كتير اوي

بحب الورد موووووت لدرجه اني بشتريه لنفسي

بحب اقرا بس ايلي بحبوا اكتر النوتس ايلي بكتبها اثناء و بعد القرايه

بحب الصور بحب اتفرج علي الصور اوي سواء لناس او حتي الصور ايلي علي عمو جوجل

مممم ايه تاني يا طماطم ؟؟

بحب اسم طماطم و فويطمه جدااااااا

لدرجه اني فكرت اسمي بنتي ان شاء الله فويطمه

بحب المزيكا بتاعت الجيتار و البيانو و الكمان ..مش عارفه ذوقي غربي شويه ليه ؟

بحب العب مع الاطفال موووووت و دايما عندي طريقه جديده عشان نتواصل

نفسي بجد اولادي يبقوا احسن اولاد في الدنيا و اعلمهم كل حاجه و اربيهم ليصبحوا نواه مجتمع مسلم متوازن ممتاز (م.م.م) هههههههههههه

ااااه بحب اللحمه اكتر من الفراخ و خصوصا الستيك بالماشروم صوص بس للاسف بضطر اكل فراخ عشان هي الاضمن دلوقتي

بحب الهدايا ,,,,, دي بحبها من الناحيتين بحب اديها اوي بس الاهم من الهديه اني بجد لما بجيب هديه بيبقي اكتر حاجه بفكر فيها نظره الرضا في عيون ايلي جايبالوا الهديه ...........................و بحب اوي الهدايا ايلي بتجيلي بحبها لما يكون ايلي جايبها جايبها بنفس و عايز

يبسطني مش سد خانه و لا مجامله حتي لو كانت حته ورقه مكتوب عليها بحبك بجد بس حسيتها تبقي عندي الدنيا و ما فيها

مممممممممممممممم كفايه انهارده كده

درج الاحلام

2009-02-16T03:49:00.001+02:00

درج المكتب التحتاني عامل دوشه و ازعرينه و اصوات عجيبه!!!!
أروح افتحه؟؟؟؟
لا استني خدي بالك!!
خبي قلبك كويس قبل ما تفتحيه
لحسن الامر ما يسلمش
امنيه و لا حلم جميل يطلع يتشعبط في قلبك من تاني
طب و ايه يعني؟؟
ما ادام عامل دوشه كده يبقي أن أوان واحده فيهم
بجد!!!!
روحت افتح و كلي حيطه و حذر
و فجأه لقيتهم بيقولولي بووووو
اتخضيت و بصيت لهم شزرا
و قولت: ايه في ايه ليه الدوشه دي؟
قالولي: اصلك نسيتينا بقالك زمان ما زورتينا
قلنا نندهلك ندردش شويه
و نفكرك بينا و تكلمينا علينا
يمكن تجبيلنا حد جديد
او تاخدي حد بعيد
هههههه
ضحكت وكلي فرحه و امل
و قعدنا قعده صفا
و من ساعتها
و معرفتش اقفل عليهم درج
شويه اجري وراهم و شويه يجروا ورايا

شقاوه

2009-02-16T01:32:00.002+02:00

كسرت فيا قلب يومين و طلعلي مليون قلب
كترت همومي يوم نزلت انا دمعه
و صبحت تاني صباح ارسم يجي ميت بسمه
بصيت لقلبي في يوم لقيته راجل عجوز و مادد بوز
اديتله فرشه و الوان لقيته رسم احلي بستان
رجعت ابصله تاني لقيته طفل مطلعلي لسان

خرابيش كلام!

2009-02-14T22:27:00.006+02:00

خرابيش كلام في نوته قديمه بقالها يجي سنين كتير مكتوب فيها صفحتين و الباقي فاضي

و رجعت اخربش من تاني و اقول ايه؟؟؟

ده كلام مش مفهوم !! و لا دي هموم؟؟!

يمكن كلام ملقاش حد يسمعه!!!!

يمكن !!

***

من يرغب في العوده لجورب متسخ و مبتل علي اي حال!!!!(مقتبس من مدونه غاده محمد محمود)و

***

سيكون مثله كمثل جوله لشراء الملابس استمتع بها عندما لا اجتهد كثيرا في البحث عن اشياء بذاتها و لكن اترك الجيد يخطفني و ما خطف قلبي كان بالفعل هو المناسب لي و ابدو فيه في اجمل حال!!!!!

***

من الممتع ان تجد احدا يمشي معك طريقك و لكن ما هو امتع ان تجده يهتم بتفاصيلك و لا يمل منك او من حبك او من خوفك عليه.....ادعوه صديق!!!!

تفتكري يا فاطمه!!!

***

كلها حاجات صغيره و لكنها توغر صدري لانها غالبا ما كانت هي الاهم!!!!!

***

الشمس طاقه و نور و مصدر ألهام بتفتح طاقات الحياه و سر الوجود جوايا!

***

موسيقي و شمس و ممر طويل علي جنبيه زرع اخضر جميل و اخره قوس قزح و سماء صافيه زرقاء مبهجه و جيبه جينز و روح ترتفع عن ثقل الجسد لتبحث عن السلام الداخلي

تري كوب حليب في ضوء الشمس الساطع صافي اللون جميل و قطعين سكر كالؤلؤ

روح مغمضه العينين مفتوحه القلب بذراعين,,لا بل هما جناحان لحب الحب!!!

***

ريحه الشجر

ارض حجر

و قلب طفل اخضر برئ

***

نفسي في يوم ارسم سحاب

ارسم ملاك

ارسم ملامح علي الورق

و اصحي من الحلم

الاقيها صبحت حقيقه

صبحت بشر!

***

بدايه النجاح

2009-01-09T23:50:00.003+02:00

لايوجد انسان ضعيف بل يوجد انسان يجهل موطن قوته

(ليو توليستوي)

purple is a part of me !

2009-01-09T22:30:00.001+02:00

Purple is a mysterious color, associated with both

nobility and spirituality. The opposites of hot red and cool blue combine to create

this classy color.

favorite

color.

شعور الدفء

2009-01-09T21:46:00.004+02:00

الدفااااا

لا مقصدش الدفا و الواحد متلكفت و دافس نفسه تحت البطانيه في الشتا

اقصد الشعور شعور الدفء لما تشوفه في عيون حد بيحبك بجد في عيون حد انت واحشه اوي
تحسه في واحده صاحبتي بترمي نفسها في حضني عشان بتحبني بجد من كل قلبها بس مبتجيش الفرصه انها تعبر عنها بالكلام او بأي حاجه تانيه ....بس انا حسيتها و شوفتها

لما تسلم علي حد و تلاقيه مش عايز يسيب ايدك لانه لسه عايز يقولك كلام كتير بقلبه و عنيه و بايده قبل لسانه

الدفا لما اقابل واحده جارتنا جايبلنا طبق مسقعه انما ايه ريحته جامده مووت و بتقولي بألف هنا و شفا و يا رب يعجبك انا عملهولك مخصوص عشان انتي بتحبيها

الدفا لما تلاقي نفسك ماشي في طريق طويل طويل اوي و فجأه تلاقي نفسك وصلت من غير متحس عشان معاك

صاحبك ايلي مصاحبك ف قلبك قبل ما تكون ايده في ايدك

لما ازور واحده صاحبتي و لما اجي امشي ألمح في عنيها دمعه مستخبيه بتقولي لا مش تمشي دلوقتي لسه مشبعتش منك لو بايدي مكنتش سبتك طول العمر و لما ابقي خلاص علي باب الشقه يغلبها الشعور فتقول الكلام

شعور بتحسه و تشوفه في عيون الناس ملوش علاقه بالكلام ايلي بيتقال
شعوووووووور جميـــــــــــــــــــــــــــــــــــل شعور بجد فريـــــــــــــــد

شعور بيصلح كل ايلي الاعطال و الكسور و الشروخ ايلي سابوهها ناس في قلبك
هو ده الشعور ايلي بيحسسني انه الكلام مش بيعبر
لما بحس الشعور ده مع واحده صاحبتي ببقي عايزه اقولها ايوه ايوه انا حسيته
حسيت حبك ايلي زي الشمس ايلي طلع علي حياتي و دفاها و ملاها نور و أمل و بهجه

يمكن عشان كدا بحب الصيف اكتر و الشمس المشرقه بحب اشوفها بتطلع تنور طريقي و تشحن قلبي بكل الحب و الحنان

بحبك يا رب بجد اديتني نعم كتير اوي
و بحب كل حد حبني فعلا من قلبه و حسيت بدفء مشاعره بيحميني من برد ناس كتير لابسه وشوش

عقولي

2009-01-04T07:57:00.000+02:00

تمنيت لو أبقي للأبد

تمنيت لو استطيع ان اتأمل عينيك بلا هروب او كبد

و انا مفتاح قلبي عيناي

النظرات تعنيني أكثر من الكلمات

العبارات جميعها خرساء جوفاء ما لم تتحدث العينين

فهذه النظرات هي لسان حال كل انسان الذي يبوح بكل اسراره و رغباته و مواقفه

اندلعت حروب و مناقشات بين كل الافراد المعنيه

بين كل عقولي المستخبيه

ذلك العقل يحب و يهوي و يتسامح بلا حدود و يري ان البقاء و حديث العيون احلي و امتع

بينما هذا العقل يري أنه من الغباء و ليس من الكبرياء ان نستمع لترها ذلك العقل

و هذا عقل اخر حائر يفكر في حكمه الله فيما يحدث و انه هناك من الخبايا ما لا اعلم و لا ادري و انه الخير ان شاء الله

بينما عقل اخر مشغول في الاهتمام بأفعال يدعونها الناس "استذكر ....انجح .." و كل اقارب هذه الافعال

بينما اخر يتطلع الي تامل المكان الذي اشتقت اليه بالفعل و تمنيت ان ارجع اليه يوما لألقي عليه و علي اهله السلام

لم اري في حياتي اجتماع لهذه العقول جميعا في نفس الزمان و المكان و لكن احمد الله كثيرا أنه كان هناك

ذلك العقل الذي يوازن و ينظم حركه مرورهم جميعا حتي لا افقد اتزاني

متفائله حتي اخر قطره في دمي

2009-01-04T06:57:00.001+02:00

يا اهلا يا مرحب يا مراحب بالسنه الجديده
ما هو شوفي بقي يا انا يا انتي بقي
هتتسحلبي هتدحلبي هتلبسيلي اسود هتعمليلي فيلم عربي قديم
مش هتأثري فيا

لا ده كان مجرد حوار ما بيني و بين السنه الجديده ايلي اسمها 2009 دي اصلها طلعت سنه شقيه و من اولها مش بتسمع الكلام كده
اقولكم عملت معايا ايه
ممم عدي اول يوم في السنه زي الفل ماما و اختي كانوا مسافرين و كنت انا و بابا حبيبي مع بعض (حبيبي دي ليها معاني كتير :]) ماما علي طول تقول علينا ناقر و نقير و مولودين فوق روس بعض
طول الوقت نناكف و ننكش في بعض و لما اسافر و ارجعلهم اول حاجه اعملها ارخم عليه شويه ....ده حب بس منيل حبتين
ام هند بقي قعدت اذاكر و الحمد لله لحد الساعه 3 الفجر كده و ده معناه اننا دخلنا اليوم الجديد و بعدين قلت اقوم اشوف الراجل ده ساكت ليه كده و قعدنا ندردش شويه و ناكل فول سوداني و بعدها رحنا قومنا صلينا الفجر جماعه الحمد لله و بعدها كل واحد راح نام
لحد دلوقتي كله ماشي زي الفل
ايلي بعده بقي صحيت من النوم علي صلاه الجمعه كده و بابا كان نازل و لقيته مزعبب شويه كده عشان قلقان علي ماما و داليا اختي و انا طبعا قلقانه عشان عندي امتحان بكره المهم اول ما رجع من الصلاه
من غير اي مقدمات و لا اسباب منطقيه طقشنا في بعض المهم دخلت الاوضه نمت لحد ما هم رجعوا من السفر و بعدها بقي قعدت كملت مذاكره المهم البيت كان الجو فيه مكهرب و انا اعصابي بايظه اصلا عشان الامتحانات قمت لبست و قلت انا هطفش رايحه عند خالو مش مستحمله توتر من هنا لهنا هديت و كملت مذاكره و بعدها نمت شويه و صحيت علي ماما و داليا رجعوا من عند خالو
و ابتديناااا بقي شقاوه السنه اللطيفه
هبدأ اذاكر للماده ايلي عندي تاني يوم قبل كده كنت بذاكر للماده ايلي بعدها علي طول
المهم يعني افتح في اللاب توب لقيته قاطع النفس حطيته في الشحن ....ايه ده الشاحن مش شغال الكومبيوتر ايلي حيلتي ماااات قلت يا بنتي اهدي بس رحت علي عمو الديسك توب افتحه لقيته شغال الحمد لله
احط النت لقيت النت فاصل قلت عادي هدخل بالتليفون حطيت التليفون و بجرب لقيته مفيهوش مودم اصلا
ساعتها من المفاجأه قعدت اضحك ....يعني ايه مش هذاكر و لا ايه .... يالهوي بعد كل التعب ده هروح الامتحان بكره و اقول للمعيده مش عارفه اجاوب ... و هناقش المشروع ازاي انا لازم اراجع عليه قبلها
طيب هعمل ايه يا ربي؟
الساعه دلوقتي 12:30 كلمت ابن خالتي لقيت عنده امتحان و شغال علي الجهاز بتاعه
طب اروح فين يا ربي بس
اكلم مريم هي لو نازله الكليه بكره هلاقي عندها كل الحاجات ايلي تخص الماده و في نفس الوقت عندها لاب ممكن تجيبه معاها
طيب مش هينفع اكلمها علي البيت كده الناس هتقلق عشان الوقت متأخر ..خلاص اكلمها علي الموبايل
يااااااااااا لهوي الموبايل مقفول يا ربي هتسوح كده عاااااااااااااااا وااااء و كل انواع العويل و النحيب بقي
يا بت اصبري بس طب ما تكلمي حد يشوفها علي النت اكلم مين بس دلوقتي و الاقيه صاحي مممم اكلم كريم و لا طاطا و لا خالد و لا مين
لالا خالد مش ناقص توتر اصلا اصلا كفايه فيه ايلي مكفيه ...طيب و طاطا زمانها نامت يا بنتي دي عندها امتحان من بدري
طيب اكلم كريم ..... ان شاء الله الاقيه صاحي و قاعد علي النت
المهم اتصلت بكريم لقيته مش في البيت و بيقولي خلاص مروح اهو انا قلت ده زمانه يعني فاضله ربع ساعه بالكتير يعني و يروح لهجته اوحت لي بكده
انا اصلا كنت بكلمه عشان يشوف مريم علي النت و يقولها تفتح الموبايل عشان اشوف ايه نظامها يعني نازله الكليه و لا اروحلها البيت
خمس دقايق و كلمته تاني ..معلش يا كريم شوفلي معاك بالمره امتحاني بكره الساعه واحده و لا تسعه
معرفش عدي قد ايه و انا قاعده علي اعصابي ماسكه الموبايل و عماله اشرب في عصير و زبادو و معرفش ايه عشان اهدي شويه و حسيت بقي و قولوني العصبي بدأ يستهبل و لو مش هديت يبقي في مستشفي و مفيش امتحان
رحت كلمت كريم تاني قالي انه في الطريق مش فاكره اصلا كنت بقوله ايه بالظبط لاني كنت في حاله اشبه بفقدان الوعي

شويه كمان و كلمته
لقيته بيقولي اصله اسلام ماسك فيا و معرفش ايه
المهم مش فاكره ايه ايلي حصل يعني ساعتها
و بعدها قفلت معاه و سبحان الله بسرعه البرق روح و الحمد لله لقي مريم علي النت و عملها قلق
شويه صغيره و لقيت مريم بتكلمني علي الموبايل كنت حاسه اني بحلم اصلا و مش هنا بتحرك و انا فاقده الاحساس بكل الاشياء
حكيتلها الموضوع و قشطه يعني
و هصلي الفجر و انزل اروحلها
و رحت بقي و ذاكرت و رحت الكليه و امتحنت و ناقشت المشروع و الحمده لله كله عدي تمام
بس روحت بقي ميته جثه جثه و بقالي اكتر وة 12 ساعه صاحيه و قلق و توتر

بس بردو الحمد لله لسه متفائله خير انها ان شاء الله هتكون سنه سعيده علينا ان شاء الله
و انا يا انتي يا 2009

2009

2009-01-01T18:11:00.000+02:00

01/01/2009
دي بدايه سنه جديده !!!!
و بلوج بردو جديده
و اهداف جديده و ان شاء الله مناسبات سعيده
مع كل صباح يوم جديد فرصه نبدا من جديد بامل و تفائل و ثقه في الله سبحانه و تعالي انه الخير جاي مع الصباح الجديد
دي بردو بدايه فويطمه جديده
من غير ما ارفع شعار للسنه الجديده
ان شاااء الله هتكون جديده بمعني الكلمه
و يا رب ياااا رب تنصر اهلنا في غزه و تكون 2009 هي سنه التحرير